ಬರುತಿದೆ ಮತ್ತೆ ಯುಗಯುಗಾದಿ
ಹೊಸ ಚೈತ್ರಕೆ ಹಾಡಿದೆ ನಾಂದಿ
ಕೊರೆಯುವ ಚಳಿ ಹೋಗಿದೆ ಓಡಿ
ವಧುವರರಿಗೆ ಮಾಡಿದೆ ಮೋಡಿ
ಚೈತ್ರ ಕಾಲ ಬಂದಿತು ನಲಿಯುತ
ಮೈತ್ರಿ ಕೂಟದಲಿ ಝೇಂಕಾರ
ಧಾತ್ರಿ ಹಸಿರುಟ್ಟು ಕಂಗೊಳಿಸುತ
ನೇತ್ರಗಳಿಗೆ ರಸದೌತಣ ಶೃಂಗಾರ.
ಮಾವು ಚಿಗುರುತ ನಲಿಯುತಿರಲು
ಬೇವು ಹೂಬಿಟ್ಟು ವಿಜೃಂಭಿಸಿದೆ
ಜೀವನವೇ ಸುಂದರ ಗೊಳಿಸಿರಲು
ನೋವು ಮರೆತು ನಗುನಗುತಿದೆ
ಒಲವಿನಲಿ ನಲಿದಿವೆ ಕೋಗಿಲೆ, ಗಿಳಿ
ನಲಿವಿನ ಶಾಲೆ ಪ್ರಣಯಿಗಳ ಲೀಲೆ
ಕಲಿಸುತಿರೆ ಪ್ರೇಮಪಾಠ ಮರಬಳ್ಳಿ
ಸಲಿಗೆಯಲಿ ಸರಸವಾಡಿ ಅಪ್ಪುತಲಿ
ಎಲ್ಲೆಡೆ ಹಚ್ಚುಹಸಿರು ತುಂಬಿ ಧರೆ
ಹಳೆಯ ಬೇರಿಗೆ ಹೊಸ ಚಿಗುರು
ನವವಧುವಿನ ವದನದಿ ನಾಚಿಕೆತೆರೆ
ಬಯಸಿದೆ ಎಳೆಮಾವಿನ ಒಗರು.
ಕಾಲಕೆ ಕೂಡಿ ಬಂದಿದೆ ಮಧುಮಾಸ
ನವಜೋಡಿ ಮುಖದಲಿ ಮಂದಹಾಸ
ಮುದದಿ ಸೆಳೆಯಲು ಪ್ರೇಮ ಪಾಶ
ಮದುವೆ ಸವಿಗನಸಿಗೆ ಮನಕೆ ತೋಷ
✍🏻ಸ್ನೇಹದ ಸಂಕೋಲೆ ಪುಷ್ಪ
