ಇದು ಯೇಸುಕ್ರಿಸ್ತನ ಶಿಲುಬೆಗೇರಿಸುವಿಕೆ ಮತ್ತು ಮರಣವನ್ನು ಗುರುತಿಸುವ ಶೋಕದ ದಿನವಾಗಿ ಆಚರಿಸಲಾಗುತ್ತದೆ. 2025ರ ಗುಡ್‌ ಫ್ರೈಡೇಯನ್ನು ಏಪ್ರಿಲ್‌ 18ರಂದು ಶುಕ್ರವಾರ ಆಚರಿಸಲಾಗುತ್ತಿದೆ.
ಯೇಸುಕ್ರಿಸ್ತನ ಶಿಲುಬೆಗೇರಿಸುವಿಕೆಯನ್ನು ಸ್ಮರಿಸುವ ಕ್ರಿಶ್ಚಿಯನ್ ಧರ್ಮದ ಮಹತ್ವದ ಧಾರ್ಮಿಕ ದಿನಗಳಲ್ಲಿ ಶುಭ ಶುಕ್ರವಾರವೂ ಒಂದು, ಇದನ್ನು ಗುಡ್‌ ಫ್ರೈಡೇ ಎಂದೇ ಕರೆಯಲಾಗುತ್ತದೆ. ಇದು ಅವರ ತ್ಯಾಗ ಮತ್ತು ಶಿಲುಬೆಯಲ್ಲಿನ ಯಾತನೆಯ ನೆನಪಿಗಾಗಿ ಆಚರಿಸಲಾಗುವ ಶೋಕಾಚರಣೆಯ ದಿನವಾಗಿದೆ. ಗುಡ್‌ ಫ್ರೈಡೇ ಯಾವಾಗಲೂ ಶುಕ್ರವಾರದಂದು ಆಚರಿಸಲಾಗುತ್ತದೆ. ಪ್ರತಿ ವರ್ಷ, ಗುಡ್‌ ಫ್ರೈಡೇಯನ್ನು ಈಸ್ಟರ್‌ಗೆ ಮೂರು ದಿನಗಳ ಹಿಂದಿನ ಶುಕ್ರವಾರದಂದು ಆಚರಿಸಲಾಗುತ್ತದೆ.
ಗುಡ್‌ ಫ್ರೈಡೇ ಇತಿಹಾಸ
ಕ್ರಿಶ್ಚಿಯನ್ ಧರ್ಮದಲ್ಲಿ ಮಹತ್ವದ ತಿರುವು ಪಡೆದ ಯೇಸುಕ್ರಿಸ್ತನ ಶಿಲುಬೆಗೇರಿಸುವಿಕೆಯ ಸನ್ನಿವೇಶವು ಗುಡ್‌ ಫ್ರೈಡೇಗೆ ಅಡಿಪಾಯವನ್ನು ಹಾಕಿದೆ. ಬೈಬಲ್‌ನ ಹೊಸ ಒಡಂಬಡಿಕೆಯ ಪ್ರಕಾರ, ನಿರ್ದಿಷ್ಟವಾಗಿ ಮತ್ತಾಯ, ಮಾರ್ಕ್, ಲ್ಯೂಕ್ ಮತ್ತು ಯೋಹಾನನ ಸುವಾರ್ತೆಗಳ ಪ್ರಕಾರ, ರೋಮನ್ ನಾಯಕ ಪೊಂಟಿಯಸ್ ಪಿಲಾತನು ಯೇಸುವನ್ನು ಬಂಧಿಸಿ, ಆತನನ್ನು ನಿರ್ಣಯಿಸಿ, ಶಿಲುಬೆಗೇರಿಸುವಿಕೆಯಿಂದ ಮರಣದಂಡನೆ ವಿಧಿಸಿದನು. ಯೇಸುವಿನ ಶಿಷ್ಯನಾದ ಜುದಾಸ್ ಇಸ್ಕರಿಯೊಟ್ ದ್ರೋಹ ಮಾಡಿ ರೋಮನ್ ಅಧಿಕಾರಿಗಳಿಗೆ ಒಪ್ಪಿಸಿದಾಗ ಈ ಘಟನೆ ಸಂಭವಿಸುತ್ತದೆ. ಈ ದಿನವನ್ನೇ ಕ್ರಿಶ್ಚಿಯನ್ ಸಮುದಾಯದವರು ಗುಡ್‌ ಫ್ರೈಡೇ ಎಂದು ಆಚರಿಸುತ್ತಾರೆ.
ಗುಡ್‌ ಫ್ರೈಡೇ ದಿನದಂದು ಕ್ರಿಶ್ಚಿಯನ್ ಸಮುದಾಯದವರು ಯಾವುದೆ ರೀತಿಯಾದ ಪಾರ್ಟಿ, ಹಬ್ಬಗಳ ರೀತಿಯಲ್ಲಿ ಈ ದಿನವನ್ನು ಆಚರಿಸುವುದಿಲ್ಲ. ಬದಲಾಗಿ, ಇದು ಶೋಕದ ದಿನವಾದ್ದರಿಂದ ಅವರು ಹೆಚ್ಚು ಯೇಸುವಿನ ಆರಾಧನೆಯಲ್ಲಿ ಆಧ್ಯಾತ್ಮಿಕ ರೀತಿಯಲ್ಲಿ ದಿನವನ್ನು ಆಚರಿಸುತ್ತಾರೆ. ಇದು ಚಿಂತನೆ, ತ್ಯಾಗ ಮತ್ತು ಭರವಸೆಯ ಬಗ್ಗೆ ಜನರಲ್ಲಿ ಜ್ಞಾನವನ್ನು ಮೂಡಿಸುತ್ತದೆ. ಪ್ರಪಂಚದಾದ್ಯಂತದ ಕ್ರಿಶ್ಚಿಯನ್ನರು ಈ ದಿನವನ್ನು ಬಾಹ್ಯ ಸಂತೋಷದಿಂದಲ್ಲ, ಆದರೆ ಆಂತರಿಕ ಭಕ್ತಿಯಿಂದ ಆಚರಿಸುತ್ತಾರೆ. ದುಃಖವನ್ನು ವಿಜಯೋತ್ಸವವಾಗಿ ಪರಿವರ್ತಿಸುವ ಈಸ್ಟರ್ ಭಾನುವಾರವನ್ನು ಆಚರಿಸಲು ಈ ದಿನದಂದೇ ಅವರು ತಮ್ಮನ್ನು ಆಧ್ಯಾತ್ಮಿಕವಾಗಿ ಸಿದ್ಧಪಡಿಸಿಕೊಳ್ಳುತ್ತಾರೆ. ಈ ದಿನದ ಆಚರಣೆಯು ಅವರಲ್ಲಿ ಯೇಸುವಿನ ಆಳವಾದ ಭಕ್ತಿಯನ್ನು, ಮಾನವೀಯತೆಯ ಪಾಪಗಳಿಗಾಗಿ ಮಾಡಿದ ತ್ಯಾಗವನ್ನು ಮತ್ತು ನಂಬಿಕೆ, ಕ್ಷಮೆ ಹಾಗೂ ಕೃಪೆಯ ಮಹತ್ವವನ್ನು ನೆನಪಿಸುತ್ತದೆ.
ಚರ್ಚ್‌ಗಳಿಗೆ ಭೇಟಿ ನೀಡುತ್ತಾರೆ. ಚರ್ಚ್‌ಗಳಲ್ಲಿ ನಡೆಯುವಂತಹ ಆಚರಣೆಗಳಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುತ್ತಾರೆ. ಪ್ರಾರ್ಥನೆಯನ್ನು ಮಾಡುವುದರಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುತ್ತಾರೆ. ಬೈಬಲ್ ಓದುವುದು, ಸ್ತುತಿಗೀತೆಗಳನ್ನು ಹಾಡುವುದು ಮತ್ತು ಯೇಸುವಿನ ತ್ಯಾಗವನ್ನು ಸ್ಮರಿಸುತ್ತಾರೆ. ದಾನ – ಧರ್ಮದಂತಹ ಕಾರ್ಯಗಳಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುತ್ತಾರೆ.
ಈ ಶೋಕದ ದಿನವು ನಿಮ್ಮ ಹೃದಯವನ್ನು ಕೃತಜ್ಞತೆ, ದಯೆ ಮತ್ತು ಉಜ್ವಲ ನಾಳೆಗಾಗಿ ಭರವಸೆಯಿಂದ ತುಂಬಲಿ..
ಗುಡ್‌ ಫ್ರೈಡೇ ಶುಭಾಶಯಗಳು.
ವರದಿ : ಜಿಲಾನಸಾಬ್ ಬಡಿಗೇರ್
