ಬೆಳಗಿನ ವಾಕಿಂಗ್: ಕೊಬ್ಬು ಕರಗಿಸಲು ಬೆಸ್ಟ್ ದಾರಿ
ಅನೇಕ ಆರೋಗ್ಯ ತಜ್ಞರ ಪ್ರಕಾರ, ಬೆಳಗಿನ ಜಾವದ ವಾಕಿಂಗ್ಗೆ ಮೊದಲ ಸ್ಥಾನ. ನೀವು ಬ್ರೇಕ್ಫಾಸ್ಟ್ ಮಾಡುವುದಕ್ಕಿಂತ ಮುಂಚೆ ಖಾಲಿ ಹೊಟ್ಟೆಯಲ್ಲಿ ವಾಕಿಂಗ್ ಮಾಡಿದರೆ, ನಿಮ್ಮ ದೇಹವು ರಕ್ತದಲ್ಲಿರುವ ಸಕ್ಕರೆ ಮತ್ತು ಸಂಗ್ರಹವಾಗಿರುವ ಕೊಬ್ಬನ್ನು ಶಕ್ತಿಯಾಗಿ ಬಳಸಿಕೊಳ್ಳಲು ಕಲಿಯುತ್ತದೆ. ಇದನ್ನು ‘ಮೆಟಾಬಾಲಿಕ್ ಫ್ಲೆಕ್ಸಿಬಿಲಿಟಿ’ ಎಂದು ಕರೆಯಲಾಗುತ್ತದೆ. ಅಷ್ಟೇ ಅಲ್ಲ, ಬೆಳಗ್ಗೆ ವಾಕಿಂಗ್ ಮಾಡುವುದರಿಂದ ಸೂರ್ಯನ ಬೆಳಕು ನಮ್ಮ ಮೇಲೆ ಬಿದ್ದು ನಮ್ಮ ದೇಹದ ಒಳಗಿನ ಗಡಿಯಾರ ಸರಿಯಾಗುತ್ತದೆ. ಇದರಿಂದ ರಾತ್ರಿ ಚೆನ್ನಾಗಿ ನಿದ್ರೆ ಬರುತ್ತದೆ ಮತ್ತು ದಿನವಿಡೀ ಚೈತನ್ಯವಿರುತ್ತದೆ. ಯಾರಿಗೆ ಬೆಳಿಗ್ಗೆ ಹಸಿವಾಗುವುದಿಲ್ಲವೋ ಅಂತಹವರು ವಾಕಿಂಗ್ ಮಾಡಿದರೆ ಹಸಿವು ಕೂಡ ಹೆಚ್ಚಾಗುತ್ತದೆ.
ಮಧ್ಯಾಹ್ನದ ವಾಕಿಂಗ್: ಒತ್ತಡ ಕಡಿಮೆ ಮಾಡಲು ಮದ್ದು
ಎರಡನೇ ಉತ್ತಮ ಸಮಯವೆಂದರೆ ಮಧ್ಯಾಹ್ನದ ಊಟದ ವಿರಾಮದ ವೇಳೆ. ಬೆಳಗ್ಗೆಯಿಂದ ಕಂಪ್ಯೂಟರ್ ಮುಂದೆ ಕುಳಿತು ಟೆನ್ಷನ್ನಲ್ಲಿ ಕೆಲಸ ಮಾಡುವವರಿಗೆ ಇದು ವರದಾನ. ಕೇವಲ 20 ನಿಮಿಷಗಳ ಕಾಲ ವಾಕಿಂಗ್ ಮಾಡುವುದರಿಂದ ಮೆದುಳು ರಿ-ಸೆಟ್ ಆಗುತ್ತದೆ ಮತ್ತು ಒತ್ತಡದ ಮಟ್ಟ ಕಡಿಮೆಯಾಗುತ್ತದೆ. ಊಟದ ನಂತರದ ವಾಕಿಂಗ್ ನಮ್ಮ ಜೀರ್ಣಕ್ರಿಯೆಗೆ ತುಂಬಾ ಸಹಾಯ ಮಾಡುತ್ತದೆ. ಇದರಿಂದ ಊಟದ ನಂತರ ಕಾಡುವ ಅತಿಯಾದ ನಿದ್ದೆ ಅಥವಾ ಸುಸ್ತು ದೂರವಾಗಿ, ಮಧ್ಯಾಹ್ನದ ನಂತರದ ಕೆಲಸಗಳಲ್ಲಿ ಹೆಚ್ಚಿನ ಏಕಾಗ್ರತೆ ವಹಿಸಲು ಸಾಧ್ಯವಾಗುತ್ತದೆ.
ಎಷ್ಟು ಹೊತ್ತು ಮತ್ತು ಹೇಗೆ ವಾಕಿಂಗ್ ಮಾಡಬೇಕು?
ವಾಕಿಂಗ್ ಮಾಡುವುದು ಅಂದಾಕ್ಷಣ ಸುಮ್ಮನೆ ನಡೆಯುವುದಲ್ಲ. ದಿನಕ್ಕೆ ಕನಿಷ್ಠ 45 ನಿಮಿಷಗಳ ಕಾಲ ವಾಕಿಂಗ್ ಮಾಡುವುದರಿಂದ ನಮ್ಮ ಶಕ್ತಿಯ ಮಟ್ಟ ಹೆಚ್ಚುತ್ತದೆ ಎಂದು ಸಂಶೋಧನೆಗಳು ಹೇಳುತ್ತವೆ. ನೀವು ವಾಕಿಂಗ್ ಮಾಡುವಾಗ ಯಾರೊಂದಿಗಾದರೂ ಮಾತನಾಡಲು ಸಾಧ್ಯವಾಗಬೇಕು, ಆದರೆ ಹಾಡು ಹಾಡಲು ಕಷ್ಟವಾಗಬೇಕು – ಇದನ್ನು ‘ಟಾಕ್ ಟೆಸ್ಟ್’ ಎನ್ನಲಾಗುತ್ತದೆ. ಒಂದು ವೇಳೆ ನಿಮಗೆ ಸಾಧ್ಯವಾದರೆ ಸ್ವಲ್ಪ ಏರಿಳಿತ ಇರುವ ದಾರಿಗಳನ್ನು ಆರಿಸಿಕೊಳ್ಳಿ ಅಥವಾ ಮಧ್ಯೆ ಮಧ್ಯೆ ವೇಗವಾಗಿ ವಾಕಿಂಗ್ ಮಾಡಿ ಮತ್ತೆ ನಿಧಾನ ಮಾಡಿ. ಇದು ನಿಮ್ಮ ಕಾಲುಗಳ ಸ್ನಾಯುಗಳನ್ನು ಗಟ್ಟಿ ಮಾಡುತ್ತದೆ.
ದಿನನಿತ್ಯದ ಜೀವನದಲ್ಲಿ ವಾಕಿಂಗ್ ಅನ್ನು ಅಳವಡಿಸಿಕೊಳ್ಳಿ
ಕೆಲಸದ ಒತ್ತಡದ ನಡುವೆಯೂ ವಾಕಿಂಗ್ ಮರೆಯಬಾರದು ಎನ್ನುತ್ತಾರೆ ತಜ್ಞರು. ಆಫೀಸ್ನಲ್ಲಿ ಕೆಲಸ ಮಾಡುವವರು ಲಿಫ್ಟ್ ಬಳಸುವ ಬದಲು ಮೆಟ್ಟಿಲು ಬಳಸಿ ಅಥವಾ ವಾಕಿಂಗ್ ಹೋಗುವ ನೆಪದಲ್ಲೇ ಮೀಟಿಂಗ್ಗಳನ್ನು ಮಾಡಿ. ಮನೆಯಲ್ಲಿ ಕೆಲಸ ಮಾಡುವವರು ತಮ್ಮ ಡೆಸ್ಕ್ ಮುಂದೆ ಕುಳಿತುಕೊಳ್ಳುವ ಮೊದಲು ಒಂದು 15 ನಿಮಿಷ ಹೊರಗಿನ ಗಾಳಿ ಸೇವಿಸುತ್ತಾ ವಾಕಿಂಗ್ ಮಾಡಿ ಬನ್ನಿ. ಇದು ನಿಮ್ಮನ್ನು ಮಾನಸಿಕವಾಗಿ ಗಟ್ಟಿಯಾಗಿರಿಸುತ್ತದೆ.
ವಿಶೇಷ ಲೇಖನ : ಜಿಲಾನಸಾಬ್ ಬಡಿಗೇರ್
