ಗೌರವಿಸಿ ಆಕೆಯನ್ನು
ಸೀರೆಯೊಳಗಿರಲಿ
ಅವಳು ಬುರ್ಖಾದೊಳಗಿರಲಿ
ಅಥವಾ ತುಂಡು ಬಟ್ಟೆಯೊಳಗಿರಲಿ
ಹೆಣ್ಣು ಹೆಣ್ಣೇ…
ನೆನಪಿರಲಿ
ಅವಳಿಗೊಂದು ಮನವಿದೆ
ಅವಳದೇ ಆದ ಆಸೆಗಳಿವೆ, ನೋವುಗಳಿವೆ
ಬೋಗದ ವಸ್ತುವಲ್ಲ ಆಕೆ
ನಿನ್ನ ಅಗತ್ಯಗಳ ಪೂರೈಸುವ ಸೇವಕಿಯಲ್ಲ
ಕೇವಲ ಹೆರುವ ಯಂತ್ರವೂ ಅಲ್ಲವಾಕೆ….
ಅರ್ಥವ ನೀಡಿಹಳು ನಿನ್ನ ಬದುಕಿಗೆ
ಊರುಗೋಲಾಗಿಹಳು
ಬೆಳಗುವ ನಿನ್ನ ವಂಶದ ದೀಪದಮಲ್ಲಿ
ಜವಾಬ್ದಾರಿಯ ಹೊರೆಯ ಹೊತ್ತಿಹಳು ನೋಡಿಲ್ಲಿ
ಹೆಣೆಯದಿರಿ
ಅವಳ ಸುತ್ತಲೂ ನೂರು ಬಲೆಯ
ಸೀಮಿತವಲ್ಲವಾಕೆ ಕೇವಲ ಕೆಲಸಕೆ
ಎಂದೂ ಮುಗಿಯದಿಹ ನಿನ್ನ ಸ್ವಾರ್ಥಕೆ
ರೆಕ್ಕೆಯ ಹಚ್ಚು ಅವಳ ಕನಸಿಗೂ
ಒಡೆಯನಾಗುವೆ ಆಗ ಮನಸಿಗೂ
ಹಾರುವ ಹಕ್ಕಿಗೆ ಪಂಜರದ ಹಂಗೇಕೆ
ಹಾಡುವ ಕಂಠಕೆ ತಡೆಯೇಕೆ
ಹೆಣ್ಣು ಗಂಡೆಂಬ ಭೇದವ ತೊರೆ ಮನವೆ
ಮೆಟ್ಟಿಲಾಗು ಅವಳ ಕನಸಿನ ಲೋಕಕೆ
ನೀನೇ ಅರಸನಾಗುವೆ
ಅವಳೊಲುಮೆಯ ಅರಮನೆಗೆ
-ರಶ್ಮಿ ಶಮಂತ್, ಹೊಸನಗರ
