ಬದಲಾಗಿದೆ

ಎಲ್ಲಾ ಬದಲಾಗಿದೆ
ಹಿಡಿದ ಬೆರಳು
ಕೊರಳು ಹಿಸುಕುತಿದೆ
ಕರುಳ ಬಳ್ಳಿ
ವಿಷದ ಅಮಲಲಿ ತೇಲಿ

ಸಣ್ಣ ಮಾತಿಗೆ
ಧಗೆಯ ನಾಗಾಲೋಟ
ಬಣ್ಣ ಬಳಿದವನ ಮೇಲಾಟ
ಕಣ್ಣ ಕನ್ನಡಿಯಲ್ಲಿ ನೂರೆಂಟು ಅಪವಾದಗಳು

ಮತ ಬೇಟೆಗೆ
ಧನ ಕನಕ
ಅಧಿಕಾರ ದಾಹಕೆ
ಮಾರಿಕೊಂಡ ಮೈ ಮನ

ಜಾತಕದ ಹೆಸರಲಿ
ಹಣ ಬಾಕ ಸಂಸ್ಕೃತಿ
ಸತ್ತ ಹೆಣದ ಮೇಲೆ ವಂಚನೆ
ಸುತ್ತ ತಿರುಗುವ ಸ್ವಾರ್ಥದ ಗಮಲು

ಮಿಥ್ಯ ಮಾಯಾ ಬಜಾರು
ಸತ್ಯ ಸಾರುವ ಚಿತ್ರಕೆ
ಮಂಜು ಮುಸುಕಿದ ಹಾದಿ
ಸಂಚು ರೂಪಿಸಿ ಹೊಂಚು ಹಾಕುತ್ತಿವೆ

ಗದ್ದುಗೆಗೆ ಗುದ್ದಾಟ
ಅದಲು ಬದಲು ಆಟದ ಕಸರತ್ತು
ವೇಷಗಾರರ ಮಸಲತ್ತು
ನಂಬಲು ಮೀನ ಮೇಷದ ಸ್ಥಿತಿ

ಎಲ್ಲಾ ಬದಲಾಗಿದೆ
ಸುಳಿವಿಲ್ಲದೆ ಗುಂಡಿ ತೋಡಿದೆ
ಗಾಳಿಗೂ ಕರ ವಸೂಲಿ
ನಾಳೆಗಳೇ ದುಸ್ತರ

ಬದುಕುವುದು ಹೇಗೆ
ಹೆಗಲೇರಿದ ಬೇತಾಳ
ಸಾಗಲೇ ಬೇಕಿದೆ
ಮಗ್ಗಲು ಬದಲಿಸಿ ಹೊರಡಲೇ ಬೇಕಲ್ಲವೇ.

• ರೇಷ್ಮಾ ಕಂದಕೂರ