ಬಳ್ಳಾರಿ / ಕಂಪ್ಲಿ :ಕಳೆದ ರಾತ್ರಿ ಸುರಿದ ಜಿಟಿ ಜಿಟಿ ಮಳೆ ಸಹಿತ ಗಾಳಿಗೆ ಭತ್ತ, ಬಾಳೆ ಬೆಳೆಗಳು ನೆಲಕಚ್ಚಿದ್ದು ಅನ್ನದಾತರು ಕಂಗಲಾಗಿದ್ದಾರೆ. ಕಂಪ್ಲಿ ಪಟ್ಟಣ, ರಾಮಸಾಗರ, ನಂ. 10 ಮುದ್ದಾಪುರ, ಸಣಾಪುರ, ದೇವಸಮುದ್ರ, ನೆಲ್ಲೂಡಿ, ಇಟಗಿ ಸೇರಿದಂತೆ ನಾನಾ ಭಾಗದಲ್ಲಿ ಪೂರ್ವ ಮುಂಗಾರು ಮಳೆಯಿಂದಾಗಿ ರೈತರ ಬದುಕಿಗೆ ತಣ್ಣೀರು ಎರಚುವಂತಾಗಿದೆ. ಕಳೆದ ರಾತ್ರಿ ಒಂದು ಗಂಟೆ ಸುಮಾರಿಗೆ ಗುಡುಗು ಸಿಡಿಲು ಸಹಿತ ಗಾಳಿ ಮಳೆಗೆ ರೈತರು ಬೆಳೆದ ಬೆಳೆಗಳು ಭೂಮಿ ಪಾಲಾಗುವಂತಾಗಿದ್ದು, ಕೈಗೆ ಬಂದ ತುತ್ತು ಬಾಯಿಗೆ ಬರೆದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ, ಸುಮಾರು 4.2 ಮಿ. ಮೀಟರ್ ಮಳೆಯಾಗಿದ್ದು ದೊಡ್ಡ ಮಳೆಯ ಅಲ್ಲದಿದ್ದರೂ ಜಿಟಿಜಿಟಿಗೆ ಮಳೆಗೆ ಅಲ್ಲಲ್ಲಿ ಬತ್ತದ ಗದ್ದೆಗಳು ನೆಲಕ್ಕುರುಳಿರುವುದು ಕಂಡು ಬಂತು. ಕಂಪ್ಲಿ ತಾಲೂಕು ವ್ಯಾಪ್ತಿಯಲ್ಲಿ ಕೆಲ ರೈತರ ಭತ್ತದ ಬೆಳೆಗಳು ನೆಲಕ್ಕೆ ಬಿದ್ದಿದ್ದು ತೆನೆ ಉಳಿಸಿಕೊಳ್ಳಲು ಹರಸಾಹಸ ಪಡುವಂತಾಗಿದೆ. ಬಾಳೆ ಕಂಬಗಳು ಬಾಗಿದ್ದು ಬಂಬುಗಳಿಂದ ರಕ್ಷಿಸಿಕೊಳ್ಳುವ ಪರಿಸ್ಥಿತಿ ರೈತರದ್ದಾಗಿದೆ. ಈಗಾಗಲೇ ಕೆಲ ರೈತರ ಹೊಲಗಳಲ್ಲಿ ಬೆಳೆದ ಭತ್ತದ ಪಸಲು ಬಂದಿದ್ದು ಇನ್ನೇನು ಒಂದೆರಡು ವಾರದಲ್ಲಿ ಕಟಾವು ಮಾಡಲಿದ್ದಾರೆ ಆದರೆ ಈಗಿನ ಮಳೆಗೆ ರೈತರಿಗೆ ದಿಕ್ಕು ತೋಚದಂತಾಗಿದ್ದು ಮತ್ತಷ್ಟು ಮಳೆ ಬಂದರೆ ಬೆಳೆಗಳು ಸಂಪೂರ್ಣವಾಗಿ ಹಾಳಾಗುವ ಆತಂಕ ಮನೆ ಮಾಡಿದ್ದು ಫಸಲು ಕಟಾವು ಆಗುವ ತನಕ ಮಳೆ ಬಾರದಂತೆ ರೈತರು ದೇವರ ಮೊರೆ ಹೋಗುವಂತಾಗಿದೆ.
ವರದಿ : ಜಿಲಾನ್ ಸಾಬ್ ಬಡಿಗೇರ.
