ಬೀದರ್ :ಸಂಶೋಧನಾ ಕಾರ್ಯವು ಶಿಕ್ಷಣದಲ್ಲಿ ನಿರಂತರವಾಗಿ ಜರುಗಿದಾಗ ಗುಣಾತ್ಮಕ ಶಿಕ್ಷಣ ವ್ಯವಸ್ಥೆಯನ್ನು ರೂಪಿಸಬಹುದಾಗಿದೆ, ಭವಿಷ್ಯದ ಶಿಕ್ಷಕರು ನಿರಂತರವಾಗಿ ತರಗತಿಯ ವ್ಯವಸ್ಥೆಯಲ್ಲಿ ಬರುವಂತಹ ಸಮಸ್ಯೆಗಳಿಗೆ ಪರಿಹಾರ ಕೈಗೊಳ್ಳಲು ಸಂಶೋಧನೆಯನ್ನು ಕೈಗೊಳ್ಳಬೇಕು ಎಂದು ಡಾ. ಸುಷ್ಮಾ ಎನ್. ಜೋಗನ್ ಸಹಾಯಕ ಪ್ರಾಧ್ಯಾಪಕರು, ವಿಜಯನಗರ ಶ್ರೀಕೃಷ್ಣದೇವರಾಯ ವಿಶ್ವವಿದ್ಯಾಲಯ, ಬಳ್ಳಾರಿ ಅವರು ಹೇಳಿದರು.
ಸ್ಥಳೀಯ ಹೈ.ಕ.ಶಿ. ಸಂಸ್ಥೆಯ ಬಸವೇಶ್ವರ ಶಿಕ್ಷಣ ಮಹಾವಿದ್ಯಾಲಯ ಬೀದರ್ ನಲ್ಲಿ ಜರುಗಿದ ಒಂದು ದಿನದ “ಭವಿಷ್ಯದ ವ್ಯಾಪ್ತಿಯ ಕುರಿತು ಕ್ರಿಯಾ ಸಂಶೋಧನೆ” ಕಾರ್ಯಾಗಾರದಲ್ಲಿ ಸಂಪನ್ಮೂಲ ವ್ಯಕ್ತಿಯಾಗಿ ಮಾತನಾಡಿದ ಅವರು ಪ್ರಶಿಕ್ಷಣಾರ್ಥಿಗಳಿಗೆ ಭವಿಷ್ಯದಲ್ಲಿ ಕ್ರಿಯಾ ಸಂಶೋಧನೆಯ ಮಹತ್ವದ ಜೊತೆಗೆ ಅದರ ಹಂತಗಳು, ಸಮಸ್ಯೆಯ ಆಯ್ಕೆ, ಪರಿಹಾರ ಕ್ರಮಗಳ ಕುರಿತಾಗಿ ಸವಿಸ್ತಾರವಾಗಿ ಮಾತನಾಡಿದರು. ಒಬ್ಬ ಶಿಕ್ಷಕ ಕ್ರಿಯಾ ಸಂಶೋಧಕನಾಗಿ ಶಿಕ್ಷಣ ವ್ಯವಸ್ಥೆಯಲ್ಲಿ ತೊಡಗಿಸಿಕೊಂಡಾಗ ಶೈಕ್ಷಣಿಕ ವ್ಯವಸ್ಥೆಯ ಸುಧಾರಣೆ ಆಗುತ್ತದೆ.
ಸಂಶೋಧನೆ ಎಂಬುದು ವ್ಯವಸ್ಥಿತವಾದ ವೈಜ್ಞಾನಿಕವಾದ ಹಂತಗಳನ್ನು ಒಳಗೊಂಡಿದ್ದು ಸಂಶೋಧನಾ ಸಮಸ್ಯೆಯನ್ನು ಅಧ್ಯಯನ ಮಾಡಲು ಸಹಾಯಕವಾಗಿದೆ. ಸಂಶೋಧನೆಯಿಂದ ವಿಜ್ಞಾನ ಮತ್ತು ತಂತ್ರಜ್ಞಾನದ ಪ್ರಚಲಿತ ವಿದ್ಯಮಾನಗಳ ಬಗ್ಗೆ ಅರಿವು ಮೂಡಿಸುವುದಲ್ಲದೇ ವಿದ್ಯಾರ್ಥಿಗಳನ್ನು ವೈಜ್ಞಾನಿಕ ಮನೋಭಾವವನ್ನು ಮೂಡಿಸಿ ಸಂಶೋಧನಾ ಪ್ರವೃತ್ತಿಯನ್ನು, ಆಸಕ್ತಿಯನ್ನು ಬೆಳೆಸುವುದು. ಪ್ರಯೋಗಗಳ ಮೂಲಕ ಹೊಸ ಅವಿಷ್ಕಾರಗಳನ್ನು ಮಾಡಲು ವಿದ್ಯಾರ್ಥಿಗಳನ್ನು ಹುರಿದುಂಬಿಸುವುದು. ವಿದ್ಯಾರ್ಥಿಗಳಲ್ಲಿ ಸಂಶೋಧನೆಯ ಕುರಿತಾದ ಪ್ರಚಲಿತ ವಿದ್ಯಮಾನಗಳ ಬಗ್ಗೆ ಅರಿವು ಮೂಡಿಸುವುದು, ವೈಜ್ಞಾನಿಕ ಅನ್ವೇಷಣೆಗಳತ್ತ ಯುವ ಮನಸ್ಸುಗಳನ್ನು ಪ್ರೇರೇಪಿಸಲು ಸಲುವಾಗಿ ಸಂಶೋಧನೆಯು ಅಗತ್ಯವಾಗಿದೆ ಎಂದು ನುಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ ಡಾ. ಮಲ್ಲಿಕಾರ್ಜುನ ಚ. ಕನಕಟ್ಟೆ, ಪ್ರಾಂಶುಪಾಲರು, ಬಸವೇಶ್ವರ ಶಿಕ್ಷಣ ಮಹಾವಿದ್ಯಾಲಯ ಬೀದರ ಅವರು ಮಾತನಾಡಿ ವಿದ್ಯಾರ್ಥಿಗಳಿಗೆ ಸಂಶೋಧನೆಯ ಮಹತ್ವವನ್ನು ತಿಳಿ ಹೇಳಿದರು. ಜೊತೆಗೆ ಸಂಶೋಧನೆಯು ನಿರಂತರವಾಗಿ ಜರುಗಿದಾಗ ಮಾತ್ರ ವಿದ್ಯಾರ್ಥಿಗಳು ಉತ್ತಮ ರೀತಿಯಲ್ಲಿ ಬೋಧನಾಕಾರ್ಯದಲ್ಲಿ ನಿರತರಾಗಬಹುದು ಎಂದು ಹೇಳಿದರು.
ಕಾರ್ಯಾಗಾರದಲ್ಲಿ ಮಹಾವಿದ್ಯಾಲಯದ ಆಂತರಿಕ ಗುಣಮಟ್ಟ ಭರವಸೆ ಕೋಶ ಸಂಯೋಜಕರಾದ ಡಾ. ಸಂತೋಷಕುಮಾರ ಸಜ್ಜನ ಪ್ರಾಸ್ತಾವಿಕ ನುಡಿಯನ್ನು ನುಡಿದರು, ಉಪನ್ಯಾಸಕರಾದ ಡಾ. ಸಿದ್ಧರಾಮ ನೆಂಗಾ, ರಾಜೇಶ್ವರಿ ಕುದ್ರೆ, ತ್ರಿವೇಣಿ ಪಾಟೀಲ ಹಾಗೂ ಸಂಗೀತಾ ಪಾಟೀಲ್, ಸುವರ್ಣಾ ಪಾಟೀಲ ಮತ್ತು ಪ್ರಶಿಕ್ಷಣಾರ್ಥಿಗಳು ಉಪಸ್ಥಿತರಿದ್ದರು.
ಕಾರ್ಯಾಗಾರದಲ್ಲಿ ಸ್ಥಳೀಯ ಶಾಂತಿವರ್ಧಕ ಶಿಕ್ಷಣ ಮಹಾವಿದ್ಯಾಲಯ, ಕರ್ನಾಟಕ ಶಿಕ್ಷಣ ಮಹಾವಿದ್ಯಾಲಯ ಬೀದರನ ಉಪನ್ಯಾಸಕರು ಮತ್ತು ಪ್ರಶಿಕ್ಷಣಾರ್ಥಿಗಳು ಭಾಗವಹಿಸಿದರು. ಕಾರ್ಯಕ್ರಮವನ್ನು ಉಪನ್ಯಾಸಕರಾದ ವೀಣಾ ಜಲಾದೆ ಸ್ವಾಗತಿಸಿದರು, ಪಾಂಡುರಂಗ ಕುಂಬಾರ ನಿರೂಪಿಸಿದರು, ಶಿಲ್ಪಾ ಹಿಪ್ಪರಗಿ ವಂದಿಸಿದರು.
ವರದಿ: ಸಾಗರ ಪಡಸಲೆ
