ಮಳೆಯೇ ನೀ ಸುರಿಯೇ
ತುಸು ಮೆಲ್ಲನೆ ಬೀಸು ಗಾಳಿಯೇ /
ಅವಳು ಬರುವ ದಾರಿಯಲಿ
ನೀ ತಾಕದಿರು ತಂಗಾಳಿಯೇ //
ಅರಿಷಿಣ ಮೈಯ ಹಳದಿಯ ಕಾಂತಿ
ಹಾಯದಿರು ನೀ ಸುಳಿಗಾಳಿಯೇ/
ಹೂಬಿಸಿಲು ಕೂಡ ನಾಚಿ ನೀರಾಗಲಿ
ಹಗುರಾಗಿ ಸುರಿಯೇ ನೀ ಮಳೆಯೇ //
ಮಳೆಯಲಿ ನಾ ನಿನ್ನ ಜೊತೆಯಲಿ
ಕೊಡೆಯಾಗಿ ಬರುವೆ ನೀರೆಯೇ/
ಸಿಡಿಲಾಗಿ ಬರಲಿ ಮಿಂಚಾಗಿ ಬರಲಿ
ಕರಪಿಡಿದು ನಾ ನಡೆವೆ ಒಲುಮೆಯೇ //
ತಂಪಾಗಲಿ ಇಂಪಾಗಲಿ ಸಂಪಾಗಲಿ
ನಮ್ಮ ಪ್ರೇಮದುಸಿರು ಹಿತವಾಗಿರಲಿ /
ಓ…ಮೇಘಗಳೇ ಓಡದಿರಿ ನಿಲ್ಲಿರಿ
ನಮ್ಮ ಮಧುರ ಪ್ರೇಮ ಕಾವ್ಯವಾಗಲಿ//
ಬದುಕು ಬೆಳಕಾಗಲಿ ಅವಳ ನಡೆಯಲಿ
ಕಾರ್ಮೋಡ ಕವಿದು ಕತ್ತಲಾಗದಿರಲಿ /
ಬಿರುಸಾಗಿ ಜೋರಾಗಿ ಬಾರದಿರು ಮಳೆಯೇ
ಕರಗಿ ನೀರಾಗಿ ಹೋದಾಳು ಮನದರಸಿಯೇ //
- ಹನುಮಂತರಾವ್ ಬಿ ನಾಗಪ್ಪಗೋಳ ಎಂ. ಎ, ಬಿ.ಈಡಿ ಸಾಹಿತಿಗಳು ಗೋಕಾಕ 591307,
ಮೊ. 7353438928.
