” ಬಡವರಿಗೆ ನಿವೇಶನ ನೀಡಿ; ಆದರೆ ಗೋವುಗಳ ಗೋಮಾಳ ಕಸಿದುಕೊಳ್ಳಬೇಡಿ – ಸರ್ಕಾರಕ್ಕೆ ಮಲ್ಲಿಕಾರ್ಜುನಗೌಡ ಹೊಸಮನಿ ಖಡಕ್ ಎಚ್ಚರಿಕೆ. “
ಕೊಪ್ಪಳ: ರಾಜ್ಯದ ಬಡ ಮತ್ತು ನಿವೇಶನ ರಹಿತ ಕುಟುಂಬಗಳಿಗೆ 5 ಲಕ್ಷ ಉಚಿತ ನಿವೇಶನಗಳನ್ನು ಹಂಚಿಕೆ ಮಾಡುವ ಸರ್ಕಾರದ ಉದ್ದೇಶ ಸ್ವಾಗತಾರ್ಹ. ಆದರೆ ಈ ಯೋಜನೆಯ ಹೆಸರಿನಲ್ಲಿ “ಗ್ರಾಮೀಣ ಪ್ರದೇಶಗಳ ಗೋಮಾಳ ಭೂಮಿಯನ್ನು ಗುರುತಿಸಿ ನಿವೇಶನಗಳಾಗಿ ಪರಿವರ್ತಿಸುವ ಯಾವುದೇ ಪ್ರಯತ್ನವನ್ನು ಸಹಿಸುವುದಿಲ್ಲ” ಎಂದು ಕರ್ನಾಟಕ ರಾಜ್ಯ ಗೋಮಾಳ ಮತ್ತು ಸರ್ಕಾರಿ ಭೂ ರಕ್ಷಣಾ ವೇದಿಕೆಯ ರಾಜ್ಯಾಧ್ಯಕ್ಷ “ಮಲ್ಲಿಕಾರ್ಜುನಗೌಡ ಹೊಸಮನಿ” ಅವರು ಸರ್ಕಾರಕ್ಕೆ ಖಡಕ್ ಎಚ್ಚರಿಕೆ ನೀಡಿದ್ದಾರೆ.
ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲಿ ಲಭ್ಯವಿರುವ ಸರ್ಕಾರಿ ಜಮೀನುಗಳನ್ನು ಗುರುತಿಸಿ 5 ಲಕ್ಷ ರೂ. ಉಚಿತ ನಿವೇಶನಗಳನ್ನು ಹಂಚಿಕೆ ಮಾಡುವ ಉದ್ದೇಶದಿಂದ ಸರ್ಕಾರ ಕ್ರಮ ಕೈಗೊಂಡಿದೆ. ಸರ್ಕಾರಿ ಜಮೀನು ಲಭ್ಯವಿಲ್ಲದ ಸಂದರ್ಭದಲ್ಲಿ ಅಗತ್ಯವಿದ್ದರೆ ಖಾಸಗಿ ಜಮೀನುಗಳನ್ನು ಖರೀದಿಸಿ ಅಥವಾ ಸೂಕ್ತ ಭೂಮಿಯನ್ನು ಭೂಪರಿವರ್ತನೆ ಮಾಡಿ ಹೊಸ ಬಡಾವಣೆಗಳನ್ನು ನಿರ್ಮಿಸುವ ಅವಕಾಶವನ್ನೂ ನೀಡಲಾಗಿದೆ.
“ಆದರೆ ‘ಸರ್ಕಾರಿ ಜಮೀನು’ ಎಂಬ ಹೆಸರಿನಲ್ಲಿ ಗೋಮಾಳ ಭೂಮಿಯನ್ನೇ ಸುಲಭವಾಗಿ ಗುರುತಿಸುವುದು ಸರಿಯಾದ ಕ್ರಮವಲ್ಲ.”
“ಗೋಮಾಳ ಖಾಲಿ ಜಮೀನಲ್ಲ – ಗ್ರಾಮೀಣ ಜಾನುವಾರುಗಳ ಜೀವನಾಡಿ” :
ಕೆಲವು ಜಿಲ್ಲೆಗಳಲ್ಲಿ ಅಧಿಕಾರಿಗಳು ನಿವೇಶನ ಯೋಜನೆಗಾಗಿ ಭೂಮಿಯನ್ನು ಗುರುತಿಸುವ ಸಂದರ್ಭದಲ್ಲಿ ಗೋಮಾಳ ಭೂಮಿಯನ್ನೂ ಪರಿಗಣಿಸಿ ವರದಿ ಸಲ್ಲಿಸುತ್ತಿದ್ದಾರೆ ಎಂಬ ಆಕ್ಷೇಪಗಳು ಕೇಳಿಬರುತ್ತಿವೆ.
ಇಂತಹ ಕ್ರಮ ನಡೆದಿದ್ದರೆ ಅದು ಕೇವಲ ಭೂಮಿಯ ವರ್ಗಾವಣೆ ವಿಷಯವಲ್ಲ; “ಗ್ರಾಮೀಣ ರೈತರು, ಪಶುಸಂಗೋಪಕರು ಮತ್ತು ಮೂಕ ಪ್ರಾಣಿಗಳ ಬದುಕಿನ ಮೇಲಿನ ನೇರ ಹೊಡೆತವಾಗಿದೆ” ಎಂದು ಮಲ್ಲಿಕಾರ್ಜುನಗೌಡ ಹೊಸಮನಿ ಹೇಳಿದ್ದಾರೆ.
ಗೋಮಾಳ ಎಂದರೆ ಸರ್ಕಾರದ ಬಳಿ ಬಿದ್ದಿರುವ ನಿರುಪಯುಕ್ತ ಖಾಲಿ ಜಾಗವಲ್ಲ. ಅದು ಗ್ರಾಮಗಳ ಹಸು, ಎಮ್ಮೆ, ದನ-ಕರು ಹಾಗೂ ಇತರ ಜಾನುವಾರುಗಳಿಗೆ ಮೇವು ಮತ್ತು ಮೇಯುವ ಸ್ಥಳ ಒದಗಿಸುವ ಸಾರ್ವಜನಿಕ ಸಂಪನ್ಮೂಲ.
“ಇಂದು ಗೋಮಾಳವನ್ನು ನಿವೇಶನಕ್ಕಾಗಿ ತೆಗೆದುಕೊಂಡರೆ, ನಾಳೆ ರೈತನ ಜಾನುವಾರು ಎಲ್ಲಿಗೆ ಮೇಯಬೇಕು? :
ಈ ಪ್ರಶ್ನೆಗೆ ಸರ್ಕಾರ ಮತ್ತು ಅಧಿಕಾರಿಗಳು ಉತ್ತರಿಸಬೇಕು ಎಂದು ಅವರು ಆಗ್ರಹಿಸಿದ್ದಾರೆ.
“ಬಡವರ ಹೆಸರಿನಲ್ಲಿ ಮತ್ತೊಂದು ವರ್ಗಕ್ಕೆ ಅನ್ಯಾಯವಾಗಬಾರದು” :
“ನಾವು ಬಡವರಿಗೆ ನಿವೇಶನ ನೀಡುವುದನ್ನು ವಿರೋಧಿಸುವುದಿಲ್ಲ. ಬಡ ಕುಟುಂಬಗಳಿಗೆ ಮನೆ ನಿರ್ಮಿಸಿಕೊಳ್ಳಲು ನಿವೇಶನ ನೀಡುವುದು ಸರ್ಕಾರದ ಜವಾಬ್ದಾರಿ. ಆದರೆ “ಬಡವರಿಗೆ ನಿವೇಶನ ನೀಡುವ ಹೆಸರಿನಲ್ಲಿ ಮತ್ತೊಬ್ಬ ಬಡ ರೈತನ ಜಾನುವಾರುಗಳ ಮೇವು ಕಸಿದುಕೊಳ್ಳುವುದು ಯಾವ ನ್ಯಾಯ?” ಎಂದು ಮಲ್ಲಿಕಾರ್ಜುನಗೌಡ ಹೊಸಮನಿ ಪ್ರಶ್ನಿಸಿದ್ದಾರೆ.
ಸರ್ಕಾರದ ಬಳಿ ಇರುವ ಇತರ ಸೂಕ್ತ ಸರ್ಕಾರಿ ಜಮೀನುಗಳನ್ನು ಮೊದಲು ಗುರುತಿಸಬೇಕು. ಅಗತ್ಯವಿದ್ದರೆ ಖಾಸಗಿ ಜಮೀನುಗಳನ್ನು ಕಾನೂನುಬದ್ಧವಾಗಿ ಖರೀದಿಸಬೇಕು. ಹೊಸ ಬಡಾವಣೆಗಳನ್ನು ನಿರ್ಮಿಸಬೇಕಾದರೆ ಸೂಕ್ತ ಭೂಮಿಯನ್ನು ಭೂಪರಿವರ್ತನೆ ಮಾಡಿ ಅಭಿವೃದ್ಧಿಪಡಿಸಬೇಕು.
“ಆದರೆ ಗೋಮಾಳ ಮಾತ್ರ ಯಾವುದೇ ಕಾರಣಕ್ಕೂ “ಸುಲಭವಾಗಿ ಸಿಗುವ ಸರ್ಕಾರಿ ಜಮೀನು” ಎಂಬ ಕಾರಣಕ್ಕೆ ಯೋಜನೆಗಳಿಗೆ ಬಲಿಯಾಗಬಾರದು” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
“ಗೋಮಾಳದ ಮೇಲೆ ಕಣ್ಣು ಹಾಕುವ ಅಧಿಕಾರಿಗಳೇ ಹೊಣೆ !”
ಜಿಲ್ಲಾಧಿಕಾರಿಗಳ ನೇತೃತ್ವದಲ್ಲಿ ನಡೆಯುತ್ತಿರುವ ಭೂಮಿಯ ಗುರುತಿಸುವಿಕೆ ಪ್ರಕ್ರಿಯೆಯಲ್ಲಿ ತಹಶೀಲ್ದಾರರು, ಕಂದಾಯ ನಿರೀಕ್ಷಕರು ಹಾಗೂ ಗ್ರಾಮ ಆಡಳಿತಾಧಿಕಾರಿಗಳು ಅತ್ಯಂತ ಎಚ್ಚರಿಕೆಯಿಂದ ಕಾರ್ಯನಿರ್ವಹಿಸಬೇಕು.
ಪ್ರತಿ ಗ್ರಾಮದ ಗೋಮಾಳ ಭೂಮಿಯ ದಾಖಲೆ, ವಿಸ್ತೀರ್ಣ, ಗಡಿ ಮತ್ತು ಪ್ರಸ್ತುತ ಬಳಕೆಯನ್ನು ಪರಿಶೀಲಿಸಬೇಕು. ಗೋಮಾಳ ಭೂಮಿಯನ್ನು ತಪ್ಪಾಗಿ ನಿವೇಶನ ಯೋಜನೆಗೆ ಸೇರಿಸಿ ವರದಿ ಸಲ್ಲಿಸಿದರೆ, “ಅದರ ಪರಿಣಾಮವಾಗಿ ಉಂಟಾಗುವ ಸಮಸ್ಯೆಗೆ ಸಂಬಂಧಿಸಿದ ಅಧಿಕಾರಿಗಳೇ ಜವಾಬ್ದಾರರಾಗಬೇಕಾಗುತ್ತದೆ” ಎಂದು ಹೊಸಮನಿ ಎಚ್ಚರಿಸಿದ್ದಾರೆ.
ಗೋಮಾಳ ಉಳಿಸಿ – ರೈತ ಉಳಿಸಿ – ಜಾನುವಾರು ಉಳಿಸಿ” :
ರಾಜ್ಯದ ಪ್ರತಿಯೊಂದು ಜಿಲ್ಲೆಯಲ್ಲಿರುವ ಗೋಮಾಳ ಭೂಮಿಯನ್ನು ಸಮಗ್ರವಾಗಿ ಗುರುತಿಸಿ ಸಂರಕ್ಷಿಸಬೇಕು. ಗೋಮಾಳಗಳ ಸುತ್ತ “ತಂತಿಬೇಲಿ ಅಳವಡಿಸಿ ಒತ್ತುವರಿ ಮತ್ತು ಅತಿಕ್ರಮಣ ತಡೆಯಬೇಕು.”
ಗೋಮಾಳಗಳನ್ನು ಕೇವಲ ದಾಖಲೆಗಳಲ್ಲಿ ಉಳಿಸುವುದಲ್ಲದೆ, ಅವುಗಳನ್ನು ಅಭಿವೃದ್ಧಿಪಡಿಸಿ ಜಾನುವಾರುಗಳಿಗೆ ಅಗತ್ಯವಿರುವ “ಮೇವು, ನೀರು ಮತ್ತು ಮೂಲಭೂತ ಸೌಲಭ್ಯಗಳನ್ನು ಕಲ್ಪಿಸಬೇಕು” ಎಂದು ಅವರು ಸರ್ಕಾರವನ್ನು ಒತ್ತಾಯಿಸಿದ್ದಾರೆ.
ಈಗಾಗಲೇ ಅನೇಕ ಗ್ರಾಮಗಳಲ್ಲಿ ಗೋಮಾಳ ಭೂಮಿಗಳು ಒತ್ತುವರಿ ಹಾಗೂ ಅಕ್ರಮ ಅತಿಕ್ರಮಣಕ್ಕೆ ಒಳಗಾಗಿರುವ ಆರೋಪಗಳಿವೆ. ಇಂತಹ ಸಂದರ್ಭದಲ್ಲಿ ಉಳಿದಿರುವ ಗೋಮಾಳವನ್ನೂ ನಿವೇಶನ ಯೋಜನೆಗೆ ಬಳಸಿದರೆ ಗ್ರಾಮೀಣ ಪ್ರದೇಶಗಳಲ್ಲಿ ಪಶುಸಂಗೋಪನೆಗೆ ದೊಡ್ಡ ಹೊಡೆತ ಬೀಳಲಿದೆ ಎಂದು ಅವರು ಹೇಳಿದ್ದಾರೆ.
” ಸರ್ಕಾರಕ್ಕೆ ಸ್ಪಷ್ಟ ಸಂದೇಶ ” :
“5 ಲಕ್ಷ ಬಡ ಕುಟುಂಬಗಳಿಗೆ ನಿವೇಶನ ನೀಡಿ : ಆದರೆ 5 ಲಕ್ಷ ಕುಟುಂಬಗಳ ಜಾನುವಾರುಗಳಿಗೆ ಇರುವ ಗೋಮಾಳವನ್ನು ಕಸಿದುಕೊಳ್ಳಬೇಡಿ. ಬಡವರ ಮನೆ ಕಟ್ಟಲು ಗೋವುಗಳ ಮೇವು ಭೂಮಿಯನ್ನು ಬಲಿಕೊಡುವ ಅಭಿವೃದ್ಧಿ ನಮಗೆ ಬೇಕಿಲ್ಲ.”
ಗೋಮಾಳ ಭೂಮಿಯನ್ನು ಯಾವುದೇ ಕಾರಣಕ್ಕೂ ನಿವೇಶನ ಯೋಜನೆಗೆ ಬಳಸಬಾರದು. ಈಗಾಗಲೇ ಗುರುತಿಸಿರುವ ಗೋಮಾಳ ಭೂಮಿಗಳಿದ್ದರೆ ಅವುಗಳ ಪ್ರಸ್ತಾವನೆಗಳನ್ನು ಮರುಪರಿಶೀಲಿಸಿ ಕೈಬಿಡಬೇಕು. ರಾಜ್ಯದಾದ್ಯಂತ ಗೋಮಾಳ ಭೂಮಿಗಳ ಸಂರಕ್ಷಣೆಗೆ ಸರ್ಕಾರ ವಿಶೇಷ ಆದೇಶ ಹೊರಡಿಸಬೇಕು ಎಂದು ಕರ್ನಾಟಕ ರಾಜ್ಯ ಗೋಮಾಳ ಮತ್ತು ಸರ್ಕಾರಿ ಭೂ ರಕ್ಷಣಾ ವೇದಿಕೆ ಆಗ್ರಹಿಸಿದೆ.
“ಗೋಮಾಳದ ಒಂದು ಗುಂಟೆ ಭೂಮಿಯನ್ನೂ ಕಳೆದುಕೊಳ್ಳಲು ಬಿಡುವುದಿಲ್ಲ. ಸರ್ಕಾರ ಬಡವರಿಗೆ ನಿವೇಶನ ನೀಡಲಿ; ನಾವು ಸ್ವಾಗತಿಸುತ್ತೇವೆ. ಆದರೆ ಗೋಮಾಳದ ಸಂರಕ್ಷಣೆಯಲ್ಲಿ ಯಾವುದೇ ರಾಜಿ ಇಲ್ಲ. ಗೋಮಾಳ ಉಳಿಸುವ ಹೋರಾಟವನ್ನು ರಾಜ್ಯಾದ್ಯಂತ ತೀವ್ರಗೊಳಿಸಲಾಗುವುದು”ಎಂದು ರಾಜ್ಯಾಧ್ಯಕ್ಷ ಮಲ್ಲಿಕಾರ್ಜುನಗೌಡ ಹೊಸಮನಿ ಖಡಕ್ ಎಚ್ಚರಿಕೆ ನೀಡಿದ್ದಾರೆ.
