ಕುಶಾಲನಗರ: ಆನೆ ಕಾಡು ಬಳಿ ನಡೆದ ಅಪಘಾತದಲ್ಲಿ ಮೃತಪಟ್ಟ ರತನ್ ಉಣ್ಣಿಯವರ ಶರೀರದಲ್ಲಿದ್ದ ಆಭರಣಗಳನ್ನು ದೋಚಿರುವ ಪ್ರಕರಣ ಕುರಿತು ಆರೋಪಿಗಳನ್ನು ಕೂಡಲೆ ಬಂಧಿಸಿ ಕಾನೂನಾತ್ಮಕ ಕ್ರಮ ಕೈಗೊಳ್ಳಬೇಕು ಎಂದು ಕರ್ನಾಟಕ ರಕ್ಷಣಾ ವೇದಿಕೆ ಆಗ್ರಹಿಸಿದೆ.
ಸೆ.20 ರಂದು ನಡೆದ ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡಿದ್ದ ರತನ್ ಉಣ್ಣಿಯವರನ್ನು ನಗರದ ಸರ್ಕಾರಿ ಆಸ್ಪತ್ರೆಯಲ್ಲಿ ದಾಖಲಿಸಿದ ಸಂದರ್ಭದಲ್ಲಿ ಇ.ಸಿ.ಜಿ ತೆಗೆಯಲು ಕೊಂಡೊಯ್ಯುವವರೆಗೂ ಅವರ ಶರೀರದಲ್ಲಿ ಚಿನ್ನದ ಆಭರಣಗಳು ಇರುವುದನ್ನು ಮೃತಪಟ್ಟ ರತನ್ ಉಣ್ಣಿಯವರ ಸ್ನೇಹಿತರು ಗಮನಿಸಿದ್ದು, ತದನಂತರ ಆಭರಣಗಳನ್ನು ಅಲ್ಲೇ ತೆಗೆದಿರಿಸಿದ್ದಾರೋ ಅಥವಾ ಶವಾಗಾರದಲ್ಲಿ ನಾಪತ್ತೆಯಾಗಿದೆಯೋ ಎಂಬ ಅನುಮಾನಗಳು ಉಂಟಾಗಿತ್ತು.
ವೈದ್ಯರು ರತನ್ ಅವರನ್ನು ಇ.ಸಿ.ಜಿ ಮಾಡಲು ಕರೆದುಕೊಂಡು ಹೋದಾಗ, ಅವರ ಕೊರಳಲ್ಲಿ ಚಿನ್ನದ ಚೈನ್ ಹಾಗೂ ಕಿವಿಯಲ್ಲಿ ಓಲೆ ಇತ್ತು. ರತನ್ ಅವರ ಸಂಬಂಧಿಯೇ ಅವರನ್ನು ಇಸಿಜಿ ಕೋಣೆಗೆ ಬಿಟ್ಟು ಬಂದಿದ್ದರು. ನಂತರ ಆಸ್ಪತ್ರೆ ಸಿಬ್ಬಂದಿ ಮೃತದೇಹವನ್ನು ಗಾಡಿಯಲ್ಲಿ ಶವಾಗಾರಕ್ಕೆ ಸಾಗಿಸಿದ್ದರು.
ಮಹಜರು ಮತ್ತು ಮರಣೋತ್ತರ ಪರೀಕ್ಷೆ ಆಗುವವರೆಗೆ ಆಸ್ಪತ್ರೆಯವರು ಯಾರನ್ನೂ ಒಳಗಡೆ ಬಿಟ್ಟಿರಲಿಲ್ಲ. ಮರುದಿನ ಮೃತರ ಪತ್ನಿಯನ್ನು ಪೊಲೀಸರು ಕರೆಸಿದ್ದರು.
ಮಹಜರು ವೇಳೆ ವಶಕ್ಕೆ ಪಡೆದ ವಸ್ತುಗಳನ್ನು ವಾರಸುದಾರರಿಗೆ ಒಪ್ಪಿಸಬೇಕೆಂದು ಚಿನ್ನದ ಬಗ್ಗೆ ಕೇಳಿದಾಗ, ನಮಗೆ ಗೊತ್ತಿಲ್ಲ ಎಂದು ಪೊಲೀಸರು ಹೇಳಿದರು.
ಕೂಲಕುಂಶವಾಗಿ ವಿಚಾರಿಸಿದಾಗ ಕಿವಿಯ ಓಲೆ ಕಸದ ಬುಟ್ಟಿಯಲ್ಲಿ ಇತ್ತು ಎಂದು ಹೇಳಿ ಅದನ್ನು ನೀಡಿದ್ದಾರೆ. ಆದರೆ ಕೊರಳ ಚೈನ್ ನಾಪತ್ತೆಯಾಗಿತ್ತು. ಈ ಬಗ್ಗೆ ಕೇಳಿದಾಗ ಸಂಚಾರಿ ಪೇದೆ ಕೆಂಡಾಮಂಡಲವಾದರು.
ಕರವೇ ಕಾರ್ಯಕರ್ತರಾದ ಬಿ.ಜೆ. ಅಣ್ಣಯ್ಯ, ರಾಜೇಶ್, ಗೋವಿಂದರಾಜ್ ದಾಸ್ ಹಾಗೂ ಫಯಾಜುದ್ದೀನ್ ಟ್ರಾಫಿಕ್ ಇನ್ಸ್ಪೆಕ್ಟರ್ ಶ್ರೀಮತಿ ಗೀತಾರವರಿಗೆ, ದೂರು ನೀಡಿ, ಮೃತರ ದೇಹದಲ್ಲಿದ್ದ ಚಿನ್ನ ಕಾಣೆಯಾಗಿರುವ ಬಗ್ಗೆ ತನಿಖೆ ನಡೆಸಿ ಚಿನ್ನವನ್ನು ಪತ್ತೆಹಚ್ಚುವಂತೆ ಮನವಿ ಸಲ್ಲಿಸಲಾಯಿತು.
ನೊಂದ ಕುಟುಂಬದವರು ಕರವೇಯೊಂದಿಗೆ ವಿಚಾರಣೆಗೆ ಸಹಕರಿಸಿದರು.
ಕರವೇಯ ಈ ಕಾರ್ಯಕ್ಕೆ ಸಾರ್ವಜನಿಕರಿಂದ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.
