ಹುನಗುಂದ: ಪಟ್ಟಣದ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘವು ರೈತರು, ಗ್ರಾಹಕರು ಹಾಗೂ ಠೇವಣಿದಾರರ ಸಹಕಾರದಿಂದ 2025-26ನೇ ಸಾಲಿನಲ್ಲಿ ₹20.16 ಲಕ್ಷ ನಿವ್ವಳ ಲಾಭ ಗಳಿಸಿದೆ ಎಂದು ಸಂಘದ ಅಧ್ಯಕ್ಷೆ ದೀಪಾ ಸುಂಕದ ಹೇಳಿದರು.
ಪಟ್ಟಣದ ಬಸವ ಮಂಟಪದಲ್ಲಿ ನಡೆದ ಸಂಘದ 113ನೇ ವಾರ್ಷಿಕ ಸರ್ವ ಸಾಧಾರಣ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
ಸಂಘದಿಂದ ಶೂನ್ಯ ಬಡ್ಡಿ ದರದಲ್ಲಿ ವಿತರಿಸಲಾಗುವ ಬೆಳೆ ಸಾಲದ ಪ್ರಮಾಣವನ್ನು ಸ್ವಲ್ಪ ಹೆಚ್ಚಿಸಲಾಗಿದೆ. ಸದಸ್ಯರು ಸಂಘದಿಂದ ಪಡೆದ ಬೆಳೆ ಸಾಲ, ಸಿಸಿ ಸಾಲ ಸೇರಿದಂತೆ ವಿವಿಧ ಸಾಲಗಳನ್ನು ಸಕಾಲದಲ್ಲಿ ಮರುಪಾವತಿಸುವ ಮೂಲಕ ಸಂಘದ ಪ್ರಗತಿಗೆ ಸಹಕರಿಸಬೇಕು ಎಂದು ಮನವಿ ಮಾಡಿದರು.
ಸಭೆಯಲ್ಲಿ ರೈತರಿಗೆ ಶೂನ್ಯ ಬಡ್ಡಿ ದರದಲ್ಲಿ ನೀಡಲಾಗುವ ಬೆಳೆ ಸಾಲದ ಮಿತಿಯನ್ನು ₹5 ಲಕ್ಷಕ್ಕೆ ಹೆಚ್ಚಿಸುವುದು, ಡಿವಿಡೆಂಡ್ ಹೆಚ್ಚಳ, ಸಂಘದ ಲಾಭಾಂಶ, ಸಿಸಿ ಸಾಲ ಹಾಗೂ ಕೋಲ್ಡ್ ಸ್ಟೋರೇಜ್ ಸೇರಿದಂತೆ ವಿವಿಧ ವಿಷಯಗಳ ಕುರಿತು ಸದಸ್ಯರು ಚರ್ಚಿಸಿದರು. ಸಂಘದ ಅಭಿವೃದ್ಧಿಗೆ ಹಲವು ಸಲಹೆ-ಸೂಚನೆಗಳನ್ನು ನೀಡಿದರು.
ಆಡಳಿತ ಮಂಡಳಿ ನಿರ್ದೇಶಕರಾದ ರವಿ ಹುಚನೂರ, ದೇವು ಡಂಬಳ ಹಾಗೂ ವ್ಯವಸ್ಥಾಪಕ ಸಂಗಣ್ಣ ಹಳ್ಳೂರ ಸೇರಿದಂತೆ ಇತರರು ಸದಸ್ಯರ ಪ್ರಶ್ನೆಗಳಿಗೆ ಉತ್ತರಿಸಿದರು.
ಮಹಾಂತೇಶ ಹೊಸೂರ, ಚೇತನ ಮುಕ್ಕಣ್ಣವರ, ಬಸಪ್ಪ ಹಾದಿಮನಿ, ಸಂಗಮೇಶ ಭದ್ರಶೆಟ್ಟಿ, ಅನ್ನಪೂರ್ಣ ಹೊಸೂರ, ರವಿ ಹೂಲಗೇರಿ ಹಾಗೂ ಹನಮಂತಪ್ಪ ವಾಲ್ಮೀಕಿ ಉಪಸ್ಥಿತರಿದ್ದರು.
ಚಿತ್ರಸುದ್ದಿ: ಹುನಗುಂದದ ಬಸವ ಮಂಟಪದಲ್ಲಿ ನಡೆದ 113ನೇ ವಾರ್ಷಿಕ ಸರ್ವ ಸಾಧಾರಣ ಸಭೆಯಲ್ಲಿ ಸಂಘದ ಅಧ್ಯಕ್ಷೆ ದೀಪಾ ಸುಂಕದ ಮಾತನಾಡಿದರು.
- ಕರುನಾಡ ಕಂದ ಸುದ್ದಿ
