ಬಳ್ಳಾರಿ: ಮುಂಬರುವ ನವೆಂಬರ್ 14 ಮತ್ತು 15 ರಂದು ಬಳ್ಳಾರಿ ನಗರದಲ್ಲಿ ನಡೆಯಲಿರುವ ಜಿಲ್ಲಾ 23ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರನ್ನಾಗಿ ಹಿರಿಯ ಚಲನಚಿತ್ರ ಕಥೆಗಾರ, ನಿರ್ಮಾಪಕ ಹಾಗೂ ಸಾಹಿತಿ ಸಿ.ಜಿ.ಹಂಪಣ್ಣ ಅವರನ್ನು ಸರ್ವಾನುಮತದಿಂದ ಆಯ್ಕೆ ಮಾಡಲಾಗಿದೆ.
ನಗರದ ಕನ್ನಡ ಭವನದಲ್ಲಿ ಜಿಲ್ಲಾಧ್ಯಕ್ಷ ಡಾ. ನಿಷ್ಠಿ ರುದ್ರಪ್ಪ ಅವರ ಅಧ್ಯಕ್ಷತೆಯಲ್ಲಿ ನಡೆದ ಜಿಲ್ಲಾ ಕಾರ್ಯಕಾರಿ ಸಮಿತಿಯ ಮಹತ್ವದ ಸಭೆಯಲ್ಲಿ ಈ ತೀರ್ಮಾನ ಕೈಗೊಳ್ಳಲಾಗಿದೆ. ಸಭೆಯಲ್ಲಿ ಚೋರನೂರು ಟಿ. ಕೊಟ್ರಪ್ಪ, ರಾಮನಮಲಿ ಹಾಗೂ ಪಿ.ಆರ್. ವೆಂಕಟೇಶ್ ಅವರ ಹೆಸರುಗಳು ಪ್ರಸ್ತಾಪವಾದವಾದರೂ, ಅಂತಿಮವಾಗಿ ಸಿ.ಜಿ.ಹಂಪಣ್ಣ ಅವರ ಹೆಸರನ್ನು ಸಭೆಯು ಸರ್ವಸಮ್ಮತಿಯಿಂದ ಅಂಗೀಕರಿಸಿತು.
ಬಹುಮುಖ ಪ್ರತಿಭೆಯ ಹಂಪಣ್ಣ :
1938 ಆಗಸ್ಟ್ 27 ರಂದು ಚೇಳ್ಳಗುರ್ಕಿಯಲ್ಲಿ ಜನಿಸಿದ ಸಿ.ಜಿ.ಹಂಪಣ್ಣ ಅವರು ಸಾಹಿತ್ಯ, ಪತ್ರಿಕೋದ್ಯಮ ಹಾಗೂ ಚಲನಚಿತ್ರ ಕ್ಷೇತ್ರದಲ್ಲಿ ಅಪಾರ ಸೇವೆ ಸಲ್ಲಿಸಿದ್ದಾರೆ. 1958ರಲ್ಲಿ ಮದ್ರಾಸ್ ಇಂಟರ್ ಮೀಡಿಯೇಟ್ ಪರೀಕ್ಷೆ ತೇರ್ಗಡೆಯಾದ ಇವರು, ‘ಸಂಯುಕ್ತ ಕರ್ನಾಟಕ’, ‘ಮಲೆನಾಡು ಮಾಸಪತ್ರಿಕೆ’ ಹಾಗೂ ‘ಈ ನಮ್ಮ ಕನ್ನಡನಾಡು’ ಪತ್ರಿಕೆಗಳಲ್ಲಿ ಉಪಸಂಪಾದಕರಾಗಿ ಸುದೀರ್ಘ ಸೇವೆ ಸಲ್ಲಿಸಿದ್ದಾರೆ. ಅಲ್ಲದೆ, ‘ಕನ್ನಡ ಸಿಂಧೂರ’ ಎಂಬ ಪತ್ರಿಕೆಯನ್ನು ಸ್ವತಂತ್ರವಾಗಿ ಮುನ್ನಡೆಸಿದ ಹೆಗ್ಗಳಿಕೆ ಇವರದ್ದಾಗಿದೆ.
ಚಿತ್ರರಂಗದಲ್ಲಿ ಕಥೆಗಾರರಾಗಿ, ನಿರ್ದೇಶಕರಾಗಿ ಹಾಗೂ ನಿರ್ಮಾಪಕರಾಗಿ ಗುರುತಿಸಿಕೊಂಡಿರುವ ಹಂಪಣ್ಣ ಅವರು ಸಾಹಿತ್ಯ ಲೋಕಕ್ಕೆ ಅಮೂಲ್ಯ ಕೊಡುಗೆ ನೀಡಿದ್ದಾರೆ. ‘ಕನ್ನಡ ನಾಡು ಸೊಬಗಿನ ಬೀಡು’, ‘ಪ್ರೇಮಪಾಶ’, ‘ದಾರಿದೀಪ’, ‘ವಿಧಿವಿಲಾಸ’, ‘ನಂದನವನ’, ‘ಕಾಣಿಕೆ’, ‘ಒಡೆಯಿತು ಒಲವಿನ ಕನ್ನಡಿ’ ಹಾಗೂ ‘ದೈವ ಸಂಕಲ್ಪ’ ಸೇರಿದಂತೆ ಒಟ್ಟು 19 ಪ್ರಮುಖ ಕೃತಿಗಳನ್ನು ಇವರು ರಚಿಸಿದ್ದಾರೆ. ಇವರ ಜೀವಮಾನದ ಸಾಧನೆಗೆ ಪ್ರತಿಷ್ಠಿತ ‘ಡಾ. ಡಿ.ವಿ. ಗುಂಡಪ್ಪ ಪ್ರಶಸ್ತಿ’ ಸೇರಿದಂತೆ ಹತ್ತು ಹಲವು ಗೌರವಗಳು ಲಭಿಸಿವೆ.
ವರದಿ : ಜಿಲಾನಸಾಬ್ ಬಡಿಗೇರ್
