ರಾತ್ರಿ-
ಮಗ್ಗುಲಾದರೆ ಕಣ್ರೆಪ್ಪೆ ತಗಲುವಷ್ಟು ಹತ್ತಿರ
ಮೈ ಮೆತ್ತಿಕೊಳ್ಳುವ ಪರಿಚಿತರಾದರೂ
ಬೆಳ್ಳಂ ಬೆಳಗ ಹಗಲಲಿ
ಜನ್ಮಾಂತರದ ಅಪರಿಚಿತರು
ಮನಸ್ಸಿನ ಸಂದಿಗೊಂದಿಗಳಲಿ
ಎಂದೂ ಹೆಜ್ಜೆಯಿಕ್ಕದ
ರಮ್ಯಭಾವನೆಗಳ ನವಿರ
ಸ್ಪಂದನವೇನೆಂದೇ ತಿಳಿಯದ
ಕಡು ಅಪರಿಚಿತತೆಯ
ಅಯೋಮಯ ವ್ಯಸ್ತಪುರುಷ
ಬೆಳಕ ದೊಂದಿ
ಕೈಯಲಿದ್ದೂ ಎಣ್ಣೆಯನಿಕ್ಕಿ
ಬೆಳಕ ನೇಯಲಾರದ
ಅಕುಶಲಕರ್ಮಿ ನೀನೆಂದರೆ
ಕಟೋಕ್ತಿಯಲ್ಲ
ಕಣ್ಣು ಕಣ್ಣಲ್ಲಿ ಬೆರೆಸಿ
ತುಟಿಯ ನಗೆ ಹೆಕ್ಕಿ
ಕೆನ್ನೆ ಗುಣಿಯಲಿ ಹಾಸ್ಯದೊರತೆಯ
ರಸದುಂಬಿ ಹೃದಯಕ್ಕೆ ಕನ್ನ
ಹಾಕಲರಿಯದ
ಬರೀ ಆಕಾರದ ಡಿಂಬ
ಜೋಡಾಗಿ ಸಪಪದಿ ತುಳಿದ ಶಾಸ್ತ್ರ
ದಿಕ್ತಪ್ಪಿದವು ದಾರಿ ಕಳೆದು
ಬದುಕ ಯಾನದಲಿ
ಜೊತೆಯಾಗಿ ಹುಟ್ಟ ಹಿಡಿದವರು
ಭರತ ಇಳಿತದ ಹಾದಿಗುಂಟ
ಸಾಮರಸ್ಯವಿರದ
ವಿಮುಖ ಪಯಣದ ಹೆಜ್ಜೆ
ಸರಸ-ಸುಮ್ಮಾನ ಸತ್ತ
ನಿರ್ವ್ಯಾಜ-ನಿರ್ಮೋಹ ನಿಟ್ಟುಸಿರು
ಗುರುತು ಗುರಿಯಿರದ ಪಯಣ
ಅಸಾಂಗತ್ಯ ದಾಂಪತ್ಯ
ಲೇಖಕಿ: ವೈ.ಕೆ.ಸಂಧ್ಯಾ ಶರ್ಮ, ಬೆಂಗಳೂರು.
