ಬಳ್ಳಾರಿ/ ಕಂಪ್ಲಿ : ಕಳೆದ ಮೂರು, ನಾಲ್ಕು ದಿನಗಳಿಂದ ಆಗಾಗ ಬಂದು ಹೋಗುತ್ತಿದ್ದ ಮಳೆ ಶುಕ್ರವಾರ ಬೆಳಗಿನಿಂದಲೇ ಜಿಟಿ, ಜಿಟಿ ಮಳೆ ಶುರುವಾಗಿದ್ದು, ಜನಜೀವನ ಅಸ್ತವ್ಯಸ್ತವಾಗಿದೆ.
ಮುಂಗಾರು ಆರಂಭದ ದಿನಗಳಲ್ಲಿ ಅಬ್ಬರಿಸಿ ಬೊಬ್ಬಿರಿದಿದ್ದ ಮಳೆ ನಂತರದ ಕೆಲವು ದಿನಗಳ ಕಾಲ ಹೊರಪು ಕೊಟ್ಟಿತ್ತು. ನಂತರ ಮಳೆ ಮಾಯವಾಗಿತ್ತು. ನಂತರದ ಕೆಲವು ದಿನ ಬೇಸಿಗೆಯ ಬಿಸಿಲನ್ನು ನೆನಪಿಸುವಂತ ಬಿರು ಬಿಸಿಲು ಸಾರ್ವನಿಕರಿಗೆ ಸಾಕಪ್ಪ ಸಾಕು ಎನ್ನುವಂತಾಗಿತ್ತು. ಕಳೆದ ಒಂದು ವಾರದಿಂದ ಮೋಡ ಕವಿದ ವಾತಾವರಣ, ಆಗಾಗ ತುಂತುರು ಮಳೆ ಬೀಳುತ್ತಿದ್ದು ಇದೇನಪ್ಪಾ ಬಿಸಿಲನಾಡು ಮಲೆನಾಡಾಯಿತಲ್ಲ ಎನ್ನುವಂತೆ ಪರಿಸ್ಥಿತಿ ಆರಂಭವಾಗಿತ್ತು. ಇದೀಗ ಎರಡು ದಿನಗಳ ಕಾಲ ಬಿಸಿಲಿನ ವಾತಾವರಣದಿಂದ ತಂಪಾದ ವಾತಾವರಣಕ್ಕೆ ಪರಿಸರ ಬದಲಾಗಿದೆ. ಅದರಲ್ಲೂ ಆಗಾಗ ತುಂತುರು ಮಳೆ ಬರುತ್ತಿತ್ತು. ಆದರೆ, ಬೆಳಗಿನಿಂದಲೇ ಜಿಟಿ ಜಿಟಿ ಆಗಾಗ ರಭಸದಿಂದ ಮಳೆಯಾಗತ್ತಿದ್ದು, ಜನಜೀವನ ಆಸ್ತವ್ಯಸ್ತವಾಗಿದೆ. ಜೊತೆಗೆ ನಿರಂತರ ಮಳೆಯಿಂದಾಗಿ ವಿದ್ಯುತ್ ಸರಬರಾಜಿಲ್ಲಿ ವ್ಯತ್ಯಯವಾಗುತ್ತಿದ್ದು ಸಾರ್ವಜನಿಕರಿಗೆ ತೊಂದರೆಯಾಗಿದೆ. ನಿರಂತರ ಜಿಟಿ ಜಿಟಿ ಮಳೆ ಕೃಷಿ ಚಟುವಟಿಕೆಗಳಿಗೂ ಆಡಚಣೆಯಾಗಿದ್ದು, ಬೆಳಗಿನಿಂದ ಸುರಿಯುತ್ತಿರುವ ಜಿಟಿ ಜಿಟಿ ಮಳೆ ಸಾರ್ವಜನಿಕರನ್ನು ಮನೆಯಿಂದ ಹೊರಗೆ ಬಾರದಂತೆ ಮಾಡಿದ್ದು, ಗ್ರಾಮೀಣ ಪ್ರದೇಶಗಳ ಮುಖ್ಯ ರಸ್ತೆಗಳೂ ಸೇರಿದಂತೆ ಪಟ್ಟಣದ ಮುಖ್ಯ ರಸ್ತೆಗಳು ಜನರಿಲ್ಲದೇ ಬಿಕೋ ಎನ್ನುತ್ತಿವೆ.
ವರದಿ : ಜಿಲಾನಸಾಬ್ ಬಡಿಗೇರ್
