ಬೀದರ್:ಹೈದರಾಬಾದ್‌ ಕರ್ನಾಟಕ ಶಿಕ್ಷಣ ಸಂಸ್ಥೆಗೆ ಸೇರಿದ ನಗರದ ಬಿ.ವಿ.ಭೂಮರಡ್ಡಿ ಕಾಲೇಜಿನಲ್ಲಿ ನಿನ್ನೆ ನೂತನ ಸೈನಿಕ ಶಾಲೆಗೆ ಅಡಿಗಲ್ಲು,ನೂತನ ಬಸವೇಶ್ವರ ಬಿಇಡಿ ಕಾಲೇಜಿನ ಮೊದಲನೇ ಮಹಡಿ ಕಟ್ಟಡ ಹಾಗೂ ನ್ಯಾಷನಲ್‌ ಇಂಗ್ಲಿಷ್‌ ಮೀಡಿಯಂ ಪಬ್ಲಿಕ್‌ ಶಾಲೆ,ವಿಸ್ತರಿತ ಅಕಾಡೆಮಿಕ್‌ ಬ್ಲಾಕ್‌ ಅಂಡ್‌ ಮಲ್ಟಿ ಪರ್ಪಸ್‌ ಹಾಲ್‌ ಉದ್ಘಾಟಿಸಿ ಕೇಂದ್ರ ಸಚಿವರಾದ ಭಗವಂತ ಖೂಬಾ ಮಾತನಾಡಿದರು.
ಕಳೆದ ಹತ್ತು ವರ್ಷಗಳಲ್ಲಿ ಬೀದರ್ ಜಿಲ್ಲೆಯಲ್ಲಿ ರಾಷ್ಟ್ರಮಟ್ಟದಲ್ಲಿ ಹೇಳಿಕೊಳ್ಳುವ ಯೋಜನೆಗಳು ಬಂದಿವೆ.ನರೇಂದ್ರ ಮೋದಿಯವರು ಹಾಗೂ ನನ್ನ ನಿಸ್ವಾರ್ಥದಿಂದ ಇದು ಸಾಧ್ಯವಾಗಿದೆ ಎಂದರು.
ಜಿಲ್ಲೆಗೆ 12 ರಾಷ್ಟ್ರೀಯ ಹೆದ್ದಾರಿಗಳು ಮಂಜೂರಾಗಿವೆ. ಬೀದರ್–ಔರಾದ್ ರಾಷ್ಟ್ರೀಯ ಹೆದ್ದಾರಿ ಮೇಲೆ ಬರುವ ಕೌಠಾ ಸೇತುವೆ ಸ್ಥಳದಲ್ಲಿ 15 ಮೀಟರ್‌ ಉದ್ದ ಬ್ರಿಜ್‌ ಕಂ ಬ್ಯಾರೇಜ್‌ ನಿರ್ಮಾಣವಾಗುತ್ತಿದೆ.ಇದರಿಂದ ರೈತರಿಗೆ ಪ್ರಯೋಜನವಾಗಲಿದೆ.40 ವರ್ಷಗಳ ಹಿಂದೆ ಮೈಸೂರಿನಲ್ಲಿ ಸಿಪೆಟ್‌ ಕಾಲೇಜು ಆರಂಭಿಸಲಾಗಿತ್ತು. ಅದಾದ ನಂತರ ಈಗ ಬೀದರ್‌ನಲ್ಲಿ ಆರಂಭಗೊಂಡಿದೆ ಎಂದು ತಿಳಿಸಿದರು.
ಸಿಪೆಟ್‌ ಆರಂಭಗೊಂಡು ತರಗತಿಗಳು ಆರಂಭವಾಗಿವೆ.ರಾಜಕೀಯ ವಿರೋಧಿಗಳು ದಿಕ್ಕು ತಪ್ಪಿಸುತ್ತಿದ್ದಾರೆ.ಔರಾದ್ ತಾಲ್ಲೂಕಿನ ಬಲ್ಲೂರ ಬಳಿ ಹತ್ತು ಎಕರೆ ಜಮೀನು ಮಂಜೂರಾಗಿದೆ.₹50 ಕೋಟಿ ಕೇಂದ್ರದಿಂದ ಮಂಜೂರಾಗಿದೆ.ಅಲ್ಲಿ ಕಟ್ಟಡ ನಿರ್ಮಾಣವಾಗುವವರೆಗೆ ಬೀದರ್ ವಿಶ್ವವಿದ್ಯಾಲಯದಲ್ಲಿ ತಾತ್ಕಾಲಿಕವಾಗಿ ತರಗತಿಗಳನ್ನು ಆರಂಭಿಸಲಾಗಿದೆ.ರಾಜ್ಯ ಸರ್ಕಾರದ ಪಾಲಿನ ₹50 ಕೋಟಿ ಬಿಡುಗಡೆ ಮಾಡುತ್ತಿಲ್ಲ.ಸಹಕಾರವೂ ನೀಡುತ್ತಿಲ್ಲ.ಜೊತೆಗೆ ಅನಗತ್ಯ ಟೀಕೆ,ಟಿಪ್ಪಣಿಗಳನ್ನು ಮಾಡುತ್ತಿದ್ದಾರೆ ಎಂದು ಸಚಿವರು ಆರೋಪಿಸಿದರು.
ಈ ಸಂದರ್ಭದಲ್ಲಿ ವಿಜಯಪುರ–ಗದಗ ರಾಮಕೃಷ್ಣ ವಿವೇಕಾನಂದ ಆಶ್ರಮದ ನಿರ್ಭಯಾನಂದ ಸರಸ್ವತಿ ಸ್ವಾಮೀಜಿ,ಕಲಬುರಗಿ ಎಚ್‌ಕೆಇ ಸಂಸ್ಥೆ ಅಧ್ಯಕ್ಷ ಭೀಮಾಶಂಕರ ಸಿ.ಬಿಲಗುಂದಿ,ಆಡಳಿತ ಮಂಡಳಿ ಸದಸ್ಯ ಡಾ.ರಜನೀಶ್‌ ವಾಲಿ,ಉಪಾಧ್ಯಕ್ಷ ಶರಣಬಸಪ್ಪ ಆರ್‌. ಹರವಾಲ,ಕಾರ್ಯದರ್ಶಿ ಜಗನ್ನಾಥ ಬಿ.ಬಿಜಾಪುರೆ,ಜಂಟಿ ಕಾರ್ಯದರ್ಶಿ ಮಹದೇವಪ್ಪ ವಿ. ರಾಂಪುರೆ, ನಿರ್ದೇಶಕರಾದ ಅರುಣಕುಮಾರ ಎಂ.ಪಾಟೀಲ,ಎಸ್‌.ಬಿ. ಕಾಮರೆಡ್ಡಿ,ನಾಗೇಂದ್ರ ಎಸ್‌. ಮಂಠಾಳೆ ಇತರರಿದ್ದರು.
ವರದಿ:ರೋಹನ್
