ನಗರದ ಹೊನ್ನಕುಸುಮ ಸಾಹಿತ್ಯ ವೇದಿಕೆಯ ‘ತಿಂಗಳ ಹೊನಲು’ ಕಾರ್ಯಕ್ರಮದ ಅಡಿಯಲ್ಲಿ ಕಾವ್ಯೋತ್ಸವ 2026 ಕಾರ್ಯಕ್ರಮವು ಇದೇ ಭಾನುವಾರ ಬೆಳಿಗ್ಗೆ 10 ಗಂಟೆಗೆ ವಿ. ಮ. ವಸ್ತ್ರದ ಪದವಿ ಮಹಾವಿದ್ಯಾಲಯದಲ್ಲಿ ನಡೆಯಲಿದೆ.
ಸದರಿ ಕಾರ್ಯಕ್ರಮದಲ್ಲಿ ಆಧುನಿಕ ಕಾವ್ಯದ ಪ್ರಕಾರಗಳಾದ ಕವಿತೆ, ಹನಿಗವಿತೆ ಗಜಲ್, ಹಾಯ್ಕು, ಚುಟುಕು, ತನಗ, ಟಂಕಾ, ಆಧುನಿಕ ವಚನ, ಆಧುನಿಕ ಷಟ್ಪದಿ ಹಾಗೂ ಪಂದಳ ಮುಂತಾದವುಗಳ ವಾಚನ- ಮಾತುಕತೆ- ಚರ್ಚೆ ಹಾಗೂ ಸಂವಾದ ನಡೆಯಲಿದೆ. ಮೇಲಿನ ಎಲ್ಲ ಕಾವ್ಯ ಪ್ರಕಾರಗಳ ಸ್ವರಚಿತ ಕವನ ವಾಚನ ಮತ್ತು ಮಾದರಿ ಕವನ ವಾಚನ ನಡೆಯಲಿದೆ.
ಕಾವ್ಯದ ಕುರಿತಾಗಿ ಇಳಕಲ್ಲಿನ ಶ್ರೀ ವಿಜಯ ಮಹಾಂತೇಶ ಪದವಿ ಕಾಲೇಜಿನ ಇಂಗ್ಲಿಷ್ ವಿಭಾಗದ ಪ್ರಾಧ್ಯಾಪಕರಾದ ಡಾ. ವಸಂತ್ ಕುಮಾರ್ ಕಡ್ಲಿಮಟ್ಟಿ ಹಾಗೂ ತಿಮ್ಮಾಪೂರಿನ ನಿವೃತ್ತ ಶಿಕ್ಷಕರಾದ ಶ್ರೀ ಎಸ್. ಎಸ್. ಹಳ್ಳೂರರವರು ಮಾತನಾಡಲಿದ್ದಾರೆ. ಕವಿಗೋಷ್ಠಿಯ ಅಧ್ಯಕ್ಷತೆಯನ್ನು ಹುನಗುಂದದ ಸಾಹಿತಿ ಮತ್ತು ಕದಳಿ ಮಹಿಳಾ ವೇದಿಕೆಯ ಅಧ್ಯಕ್ಷರಾದ ಡಾ. ಶಿವಗಂಗಾ ರಂಜಣಗಿಯವರು ವಹಿಸಲಿದ್ದಾರೆ. ಉಳಿದಂತೆ ಹೊನ್ನಕುಸುಮ ಸಾಹಿತ್ಯ ವೇದಿಕೆಯ ಎಲ್ಲ ಪದಾಧಿಕಾರಿಗಳು, ಹುನಗುಂದ- ಇಲಕಲ್ -ಅಮೀನಗಡ ಭಾಗದ ಕವಿಗಳು, ಸಾಹಿತಿಗಳು ಹಾಗೂ ಸಾಹಿತ್ಯಾಸಕ್ತರು ಪಾಲ್ಗೊಳ್ಳಲಿದ್ದಾರೆ ಎಂದು ಹೊನ್ನಕುಸುಮ ಸಾಹಿತ್ಯ ವೇದಿಕೆ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.
