ಈ ಗುರುತು ನನ್ನದೇ
ನಾನೇ ದಕ್ಕಿಸಿಕೊಂಡದ್ದು
ಬಂಧವೆಂಬ ಬಂಧನದಿ
ನೂರಾರು ಕಟ್ಟಳೆ ದಾಟಿ ಪಡೆದದ್ದು
ಗುರುತೇ ಇಲ್ಲದೆ ದುಡಿದು
ಎಲ್ಲವನ್ನೂ ಧಾರೆಯೆರೆದು
ಮೂಲೆ ಗುಂಪಾಗಿದ್ದು ಸಾಕಾಗಿ
ಈಗಲೇ ದಕ್ಕಿಸಿಕೊಂಡದ್ದು
ಈ ಗುರುತು ನನ್ನದೇ
ನಾನೇ ದಕ್ಕಿಸಿಕೊಂಡದ್ದು
ನಿನ್ನೆ ಮೊನ್ನೆಯದಲ್ಲ ಈ ಹೋರಾಟ
ಸಾವಿರಾರು ವರುಷಗಳೇ ಉರುಳಿ
ಮನದಿ ಮೂಡಿದ ಆಸೆಗಳ
ಸಮಾಧಿ ಮಾಡಿ
ಹೊಸ ಕನಸು ಕಂಡು ಹೊಸ ಲೋಕದಿ
ಇಂದೇ ದಕ್ಕಿಸಿಕೊಂಡದ್ದು
ಈ ಗುರುತು ನನ್ನದೇ
ನಾನೇ ದಕ್ಕಿಸಿಕೊಂಡದ್ದು
ಹೆಣ್ಣೆಂಬ ಭಾವದಿ ಹಿಂಜರಿದು
ಹೇಡಿಯಂತೆ ಬದುಕಿ
ನನ್ನ ಶಕುತಿಯ ಅರಿತು
ನನ್ನ ಮನದಲಿನ ಭಾವನೆಗಳಿಗೆ
ಜೀವನೀಡಿ ಹೊಸ ರೂಪ ಕೊಟ್ಟು
ಈಗಷ್ಟೇ ಕಂಡು ಕೊಂಡದ್ದು.
ಈಗಿನ ಈ ಗುರುತು ನನ್ನದೇ
ನಾನೇ ಪಡೆದದ್ದು…
ಯಾರೋ ನೀಡಿದ್ದಲ್ಲ…..
ರಚನೆ:ಲೋಹಿತೇಶ್ವರಿ ಎಸ್.ಪಿ.
