ಬಸವ ಭಾರತ ಪ್ರತಿಷ್ಠಾನದ ವತಿಯಿಂದ ಬಸವ ಧರ್ಮ ಜಾಗೃತಿ ಅಭಿಯಾನ

ಮೈಸೂರು:ಬಸವ ಭಾರತ ಪ್ರತಿಷ್ಠಾನದ ವತಿಯಿಂದ ಮಾದಹಳ್ಳಿ ಗ್ರಾಮದಲ್ಲಿ ನಡೆದ ಬಸವ ಧರ್ಮಜಾಗೃತಿ ಅಭಿಯಾನ, ಇಷ್ಟಲಿಂಗ ಧಾರಣೆ, ಶಿವಯೋಗ ಹಾಗೂ ಶ್ರಾವಣ ಮಾಸದ ಪ್ರವಚನ ಕಾರ್ಯಕ್ರಮಗಳ ಉದ್ಘಾಟನಾ ಸಮಾರಂಭ ಅದ್ದೂರಿಯಾಗಿ ಹಾಗೂ ಅರ್ಥಪೂರ್ಣವಾಗಿ ಜರುಗಿತು. ಕಾರ್ಯಕ್ರಮದ ದಿವ್ಯ ಸಾನಿಧ್ಯ ವಹಿಸಿದ್ದ ಪರಮಪೂಜ್ಯ ಶ್ರೀ ಬಸವಯೋಗಿ ಪ್ರಭು ಸ್ವಾಮೀಜಿಗಳು ಮಾತನಾಡಿ ಅಷ್ಟಾವರಣ, ಪಂಚಾಚಾರ ಹಾಗೂ ಷಟ್ ಸ್ಥಲಗಳ ಬಗ್ಗೆ ಅರಿವು ಮೂಡಿಸಿದರು. ದೀಪವನ್ನು ಮುಟ್ಟಿದ ದೀಪ ಹೇಗೆ ಬೆಳಗುವುದೋ ಹಾಗೇ ಲಿಂಗವಂತರನ್ನು ಮುಟ್ಟಿದವರೆಲ್ಲಾ ಹಾಗೂ ಅವರ ಸಂಗಡಕ್ಕೆ ಬಂದವರೆಲ್ಲಾ ಪಾವನಿಗಳಾಗುತ್ತಾರೆ ಎಂದರಲ್ಲದೇ ಸುಮಾರು ಎಪ್ಪತ್ತಕ್ಕೂ ಅಧಿಕ ಮಕ್ಕಳಿಗೆ ಇಷ್ಟಲಿಂಗ ದೀಕ್ಷೆ ಕರುಣಿಸಿದರು.

ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಶರಣ ದೇವರಾಜು ಪಿ. ಚಿಕ್ಕಹಳ್ಳಿ ರವರು ಬೆಳಗ್ಗೆ ಎದ್ದೊಡನೆ ಯಾರನ್ನು ನೋಡಬೇಕು ಎಂಬುದನ್ನು ಶರಣರ ಈ ವಾಕ್ಯದೊಡನೆ ವಿವರಿಸಿದರು.
ಕೃಷಿ ಕೃತ್ಯ ಕಾಯಕವ ಮಾಡುವ
ಸದ್ಭಕ್ತನ ಪಾದವ ತೋರಿಸಿ ಬದುಕಿಸಯ್ಯಾ…
ಆತನ ತನು ಶುದ್ಧ…
ಆತನ ಮನ ಶುದ್ಧ…
ಆತನ ಭಾವ ಶುದ್ಧ…
ಆತನ ಮನೆಯನ್ನು ಹೊಕ್ಕು
ಪ್ರಸಾದ ಪಡೆದ ಜಂಗಮ
ಪಾವನ ನೋಡಾ ಕೂಡಲಸಂಗಮ ದೇವಾ ಎಂದರು.
ಲಿಂಗ ಧರಿಸಲು ಲಿಂಗ ಬೇಧವಿಲ್ಲ. ಇಷ್ಟಲಿಂಗ ಜನಕ ಬಸವಣ್ಣನವರು ಎಂದು ಅನೇಕ ವಚನಗಳನ್ನು ಸಾಕ್ಷಿಯಾಗಿ ಇಟ್ಟುಕೊಂಡು ವಾದಿಸಿದರು.
ಕಾರ್ಯಕ್ರಮದಲ್ಲಿ ಆಗಸ್ಟ್ ತಿಂಗಳ ಬಸವ ಭಾರತ ಮಾಸಿಕ ಪತ್ರಿಕೆಯನ್ನು ಬಿಡುಗಡೆ ಮಾಡಲಾಯಿತು.
ಕಾರ್ಯಕ್ರಮದಲ್ಲಿ ಗ್ರಾಮದ ಮುಖಂಡರಾದ ಮಹದೇವಪ್ಪ, ಚೌಹಳ್ಳಿ ನಿಂಗರಾಜಪ್ಪ, ವಿಶ್ವ ಬಸವ ಸೇನೆ ಅಧ್ಯಕ್ಷರು ಬಸವ ಯೋಗೀಶ್, ನಾಗರತ್ನಮ್ಮ ನಂಜುಂಡಪ್ಪ, ಇನ್ನಿತರರಿದ್ದರು. ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಬಸವ ಭಾರತ ಪ್ರತಿಷ್ಠಾನ ದ ಅಧ್ಯಕ್ಷ ಶಿವರುದ್ರಪ್ಪ ರವರು ಎಲ್ಲರನ್ನೂ ಸ್ವಾಗತಿಸಿ ಸನ್ಮಾನಿಸಿದರು, ಕಾರ್ಯಕ್ರಮದ ನಂತರ ಪ್ರಸಾದ ವಿನಿಯೋಗ ಜರುಗಿತು.