ಬೇವು ಮಾವು

ಬೇವು ಬೆಲ್ಲವ ಮೆಲ್ಲುವ ಹಬ್ಬ
ಮಾವಿನ ತೋರಣ ಕಟ್ಟುವ ಹಬ್ಬ
ನಾವಿನ್ಯ ಉಡುಪು ಧರಿಸುವ ಹಬ್ಬ
ಜೀವಭಾವಗಳ ಬೆಸೆಯುವ ಹಬ್ಬ//

ದೇಹಕೆ ತೈಲ ಹಚ್ಚುವ ಹಬ್ಬ
ದಾಹದ ಮನವ ತಣಿಸುವ ಹಬ್ಬ
ನೇಹ ಪ್ರೀತಿ ಹಂಚುವ ಹಬ್ಬ
ಮೋಹ ಮತ್ಸರ ದಹಿಸುವ ಹಬ್ಬ//

ಹೋಳಿಗೆ ತುಪ್ಪ ಸವಿಯುವ ಹಬ್ಬ
ಬಾಳಿಗೆ ಚೇತನ ತುಂಬುವ ಹಬ್ಬ
ಬೋಳು ಮರದಿ ಎಲೆ ಚಿಗುರುವ ಹಬ್ಬ
ಗೋಳನು ಮನದಿ ದೂಡುವ ಹಬ್ಬ//

ಕಾಸಿನ ಆಟ ಆಡುವ ಹಬ್ಬ
ಮೋಸ ವಂಚನೆ ತ್ಯಜಿಸುವ ಹಬ್ಬ
ವೇಷ ಹಾಕಿ ಕುಣಿಯುವ ಹಬ್ಬ
ಭಾಷೆ ದ್ವೇಷ ಮರೆಸುವ ಹಬ್ಬ//

ನೂತನ ಕಳೆಯ ತರುವ ಹಬ್ಬ
ಯಾತನೆ ದೂರ ಮಾಡುವ ಹಬ್ಬ
ಜಾತಿಭೇದವ ಮರೆಸುವ ಹಬ್ಬ
ನೀತಿ ಸಂಸ್ಕೃತಿ ಸಾರುವ ಹಬ್ಬ//

ಆಗಸದಿ ಚಂದ್ರನ ನೋಡುವ ಹಬ್ಬ
ರಾಗದಿ ಕೋಗಿಲೆ ಕೂಗುವ ಹಬ್ಬ
ಬೇಗುದಿ ದೂರ ಮಾಡುವ ಹಬ್ಬ
ಬಾಗಿ ಹಿರಿಯರಿಗೆ ನಮಿಸುವ ಹಬ್ಬ//

• ಯಶೋಧಮ್ಮ ಎಂ. ಬಿ.
  ತಿರುಮಗೊಂಡಹಳ್ಳಿ.