ಅದೆಷ್ಟೋ ದಿನಗಳಿಂದ ಆ ಕಣ್ಣ
ಕಣ್ಣಲಿ ಕಣ್ಣಿಟ್ಟು ಕಣ್ಣೊಳಗಿನ ಪ್ರೀತಿಯ ಕಾಣಲು
ಹವಣಿಸಿತ್ತು ಒಂದು ಕಣ್ಣು
ಆ ದಿನ ಬಂದಿತು ಆ ಕಣ್ಣು ಕೂಡಾ ಎದುರಿಗಿತ್ತು
ಆದರೇನು ಫಲ ಆ ಕಣ್ಣ ಕಂಡೊಡನೆ
ಈ ಕಣ್ಣ ಮೇಲಿನ ರೆಪ್ಪೆ ಯಾಕೋ ಮುಚ್ಚಿತು
ಜೇಬಿನ ಒಳಗೆ ಕೂತಿದ್ದ ಫೋನಿನ
ಕ್ಯಾಮೆರಾ ಕಣ್ಣು ಏನನ್ನೂ ಹೇಳದೆ
ಆ ಕಣ್ಣಿನ ಫೋಟೋ ತೆಗೆದು
ಅಲ್ಲಿಂದ ಹೊರಟಿತು
ಫೋಟೋದೊಳಗಿನ ಆ ಕಣ್ಣನು ಕೂಡಾ
ದಿಟ್ಟಿಸಿ ನೋಡಲಾಗದ ಸ್ಥಿತಿ ಅರಿತ ಕೈ ತಂತಾನೆ
ಆ ಕಣ್ಣನು ಗ್ಯಾಲರಿಯಿಂದಲೇ ತೆಗೆದು ಹಾಕಿತ್ತು
ಎಲ್ಲವನೂ ನೋಡುತ್ತಾ ಸುಮ್ಮನಿದ್ದ
ಮನಸಿಗೇಕೋ ಸಿಟ್ಟು ಬಂದು
ಅದೇ ಕೈಯಿಂದ ಕರೆ ಮಾಡಿಸಿ
ಆ ಕಣ್ಣಿನ ಪಕ್ಕದ ಕಿವಿಗಳ ಜೊತೆಗೆ ಮಾತಾಡಿಸಿ
ಮನಸಿನ ಜೊತೆ ಒಂದಾಗು ಎಂದಿತು
ಮನಸಿನ ಮಾತ ಕೇಳಿ ಹೊರಟ ಕರೆಗೆ
ಆ ಮನಸು ಯಾಕೆ ಇಷ್ಟು ತಡ ಅಂತ ಕೇಳಿತು
ಒಂದು ಪ್ರಶ್ನೆಗೆ ಶುರುವಾದ ಸಂಭಾಷಣೆ
ಸೂರ್ಯ ಹುಟ್ಟಿ ನೆತ್ತಿಗೇರಿ ಗೋಧೂಳಿ ನಂತರ ಕತ್ತಲಾಗಿ
ಲೋಕವೇ ಮಲಗಿದರೂ ಈ ಮನಸುಗಳು
ಮಾತಲ್ಲಿಯೇ ಮನೆ ಕಟ್ಟುತಿಹವು
ಹಾರೈಸಿಬಿಡಿ ಒಮ್ಮೆ ಮನಸಾರೆ
ಸೇರಿಬಿಡಲಿ ಎಂದಾದರೂ ಎಂದು
- ಬಸವರಾಜ ಬಳಿಗಾರ
