ವಿಜಯಪುರ ಜಿಲ್ಲೆಯ ಇಂಡಿ ನಗರದಲ್ಲಿ ದಸರಾ ಮುಗಿದು ದೀಪಾವಳಿ ಹಬ್ಬ ಬಂದರೂ ಕುಡಿಯುವ ನೀರಿನ ಸಮಸ್ಯೆ ತೀವ್ರಗೊಂಡಿರುವುದು ಸಾರ್ವಜನಿಕರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಸಾಲು ಸಾಲು ಹಬ್ಬಗಳ ದಿನಗಳಲ್ಲೂ ನಗರದ ಜನತೆಗೆ ಸಮರ್ಪಕವಾಗಿ ನೀರು ಪೂರೈಕೆಯಾಗದೆ ಇರುವುದು ಹಬ್ಬದ ಸಂಭ್ರಮಕ್ಕೆ ತಣ್ಣೀರೆರಚಿದಂತಾಗಿದೆ.
ವಿಜಯಪುರ ಜಿಲ್ಲೆಯ ಪ್ರಮುಖ ವಾಣಿಜ್ಯ ಕೇಂದ್ರ ಹಾಗೂ ಇತ್ತೀಚೆಗಷ್ಟೇ ಪುರಸಭೆಯಿಂದ ಮೇಲ್ದರ್ಜೆಗೆ ಏರಿದ ಇಂಡಿ ನಗರಸಭೆ ವ್ಯಾಪ್ತಿಯಲ್ಲಿ ಕುಡಿಯುವ ನೀರಿನ ಸಮಸ್ಯೆ ತೀವ್ರಗೊಂಡಿದೆ. ನಾಡಿನಾದ್ಯಂತ ದಸರಾ ಮುಗಿದು, ಬೆಳಕಿನ ಹಬ್ಬ ದೀಪಾವಳಿ ಕಳೆದರೂ ಇಂಡಿ ನಗರದ ಜನತೆಗೆ ಮಾತ್ರ ಹನಿ ನೀರು ಕಾಣದ ಪರಿಸ್ಥಿತಿ ನಿರ್ಮಾಣವಾಗಿದೆ. ಕಾಗದದ ಮೇಲೆ ಪಟ್ಟಣವು ‘ನಗರಸಭೆ’ಯಾಗಿ ಬದಲಾಗಿದ್ದರೂ, ಜನರ ಜಲಕಷ್ಟಕ್ಕೆ ಮಾತ್ರ ಮುಕ್ತಿ ಸಿಕ್ಕಿಲ್ಲ.
ಸಾಂಪ್ರದಾಯಿಕವಾಗಿ ದೀಪಾವಳಿಗೂ ಮುನ್ನ ಆಚರಿಸಲಾಗುವ ‘ನೀರು ತುಂಬುವ ಹಬ್ಬ’ದ ದಿನಗಳಲ್ಲೂ ಜನರಿಗೆ ಹಂಡೆ ತುಂಬಿಸಲು ನೀರಿಲ್ಲದೆ ಪರದಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.
ಸಾರ್ವಜನಿಕರ ಆಕ್ರೋಶ: ಹಬ್ಬದ ದಿನಗಳಲ್ಲಾದರೂ ನಗರಸಭೆ ಹಾಗೂ ಜಲಮಂಡಳಿ ಅಧಿಕಾರಿಗಳು ಸೂಕ್ತ ವ್ಯವಸ್ಥೆ ಮಾಡಬೇಕಿತ್ತು ಎನ್ನುವುದು ಸಾರ್ವಜನಿಕರ ಮತ್ತು ಗೃಹಿಣಿಯರ ಆಕ್ರೋಶಕ್ಕೆ ಪ್ರಮುಖ ಕಾರಣವಾಗಿದೆ.
ಅಧಿಕಾರಿಗಳು ಕೇವಲ ಸಭೆ ಹಾಗೂ ಕಡತಗಳಲ್ಲೇ ಕಾಲಹರಣ ಮಾಡದೆ, ಯುದ್ಧೋಪಾದಿಯಲ್ಲಿ ಬತ್ತಿಹೋಗಿರುವ ವಾರ್ಡ್‌ಗಳಿಗೆ ಟ್ಯಾಂಕರ್ ಮೂಲಕ ನೀರು ಒದಗಿಸಬೇಕಿದೆ. ಕೇವಲ ಬೋರ್ಡ್ ಬದಲಾಯಿಸಿಕೊಂಡು ‘ನಗರಸಭೆ’ಯಾಗಿ ಬೀಗುವ ಬದಲು, ಜನರಿಗೆ ಕನಿಷ್ಠ ಮೂಲಸೌಕರ್ಯವಾದ ಕುಡಿಯುವ ನೀರನ್ನು ಒದಗಿಸುವಲ್ಲಿ ಆಡಳಿತ ಮಂಡಳಿ ತಕ್ಷಣ ಕಾರ್ಯಪ್ರವೃತ್ತರಾಗಬೇಕಿದೆ.
ಇನ್ನು ಮುಂದೆಯಾದರೂ ಅಧಿಕಾರಿಗಳು ಜನ ಪ್ರತಿನಿಧಿಗಳು ಏನು ಕ್ರಮ ಕೈಗೊಳ್ಳುತ್ತಾರೆ ಎಂದು ಕಾದು ನೋಡಬೇಕಾಗಿದೆ
