ಸರ್ಕಾರದ ವಿಳಂಬ ನೀತಿಗೆ ಹೋರಾಟಗಾರರ ಆಕ್ರೋಶ; ತಾಲೂಕು ವ್ಯಾಪ್ತಿಯಲ್ಲಿ ಪ್ರತಿಭಟನೆ ತೀವ್ರಗೊಳಿಸುವ ಎಚ್ಚರಿಕೆ
ತಾಳಿಕೋಟೆ: ಪಟ್ಟಣದ ನಾಗರಿಕರ ಅನುಕೂಲಕ್ಕಾಗಿ ನಿರ್ಮಾಣವಾಗಬೇಕಿರುವ ‘ಪ್ರಜಾಸೌಧ’ವನ್ನು ಪಟ್ಟಣದ ವ್ಯಾಪ್ತಿಯನ್ನು ಬಿಟ್ಟು ಮೈಲೇಶ್ವರ ಗ್ರಾಮದ ಸಮೀಪ ನಿರ್ಮಿಸುತ್ತಿರುವುದನ್ನು ವಿರೋಧಿಸಿ ನಡೆಯುತ್ತಿರುವ ಅನಿರ್ದಿಷ್ಟಾವಧಿ ಧರಣಿ ಸತ್ಯಾಗ್ರಹವು ಮಂಗಳವಾರಕ್ಕೆ 70ನೇ ದಿನ ಪೂರೈಸಿದೆ. ದೀರ್ಘಕಾಲದ ಈ ಹೋರಾಟಕ್ಕೆ ಸರ್ಕಾರ ಹಾಗೂ ಆಡಳಿತ ವರ್ಗ ಮೌನ ವಹಿಸಿರುವುದು ಹೋರಾಟಗಾರರ ಕೆಂಗಣ್ಣಿಗೆ ಗುರಿಯಾಗಿದೆ.
ಸರ್ಕಾರದ ಮೌನಕ್ಕೆ ಹೋರಾಟಗಾರರ ಬೇಸರ
ಈ ಸಂದರ್ಭದಲ್ಲಿ ಮಾತನಾಡಿದ ಹೋರಾಟ ಸಮಿತಿಯ ಮುಖಂಡರಾದ ಕಾಶಿನಾಥ ಮುರಾಳ ಮತ್ತು ಅಮಿತ್ ಮನಗೂಳಿ , “ಸಾರ್ವಜನಿಕ ಹಿತಾಸಕ್ತಿಗಾಗಿ ನಡೆಯುತ್ತಿರುವ ಈ ಹೋರಾಟ 70 ದಿನಗಳು ಗಡಿ ದಾಟಿದೆ. ಇಲ್ಲಿ ಭಾಗವಹಿಸಿರುವ ಪ್ರತಿಯೊಬ್ಬರೂ ತಮ್ಮ ವೈಯಕ್ತಿಕ ಕೆಲಸಗಳನ್ನು ಬದಿಗಿಟ್ಟು ಊರಿನ ಹಿತಕ್ಕಾಗಿ ಹೋರಾಡುತ್ತಿದ್ದಾರೆ. ಆದರೆ, ಸರ್ಕಾರ ಕೇವಲ ಪ್ರಸ್ತಾವನೆಗಳಲ್ಲೇ ಕಾಲಹರಣ ಮಾಡುತ್ತಿರುವುದು ವಿಷಾದನೀಯ,” ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಗ್ರಾಮ ಮಟ್ಟಕ್ಕೆ ಹರಡಲಿದೆ ಹೋರಾಟದ ಕಿಚ್ಚು
ಮುಂದಿನ ದಿನಗಳಲ್ಲಿ ಹೋರಾಟವನ್ನು ಕೇವಲ ಪಟ್ಟಣಕ್ಕೆ ಸೀಮಿತಗೊಳಿಸದೆ, ತಾಲ್ಲೂಕಿನ ಪ್ರತಿ ಗ್ರಾಮಗಳ ಜನತೆಯನ್ನು ಒಗ್ಗೂಡಿಸಿ ಬೃಹತ್ ಸಭೆ ನಡೆಸಲು ಸಮಿತಿ ತೀರ್ಮಾನಿಸಿದೆ.
ಹೋರಾಟದ ಪ್ರಮುಖ ಹಕ್ಕೊತ್ತಾಯಗಳು:
ಪ್ರಜಾಸೌಧವನ್ನು ಯಾವುದೇ ಕಾರಣಕ್ಕೂ ನಗರ ವ್ಯಾಪ್ತಿಯಿಂದ ದೂರ ಕೊಂಡೊಯ್ಯಬಾರದು.
ಸಾರ್ವಜನಿಕರಿಗೆ ಸುಲಭವಾಗಿ ಎಟುಕುವ ಪಟ್ಟಣದ ಪ್ರಮುಖ ಜಾಗದಲ್ಲೇ ಕಟ್ಟಡ ನಿರ್ಮಿಸಬೇಕು.
ಪ್ರಸ್ತಾವನೆಯ ನೆಪದಲ್ಲಿ ಕಾಲಹರಣ ಮಾಡದೆ ಸರ್ಕಾರ ತಕ್ಷಣವೇ ಸ್ಥಳ ನಿಗದಿಪಡಿಸಬೇಕು.
ಧರಣಿಯಲ್ಲಿ ಮುತ್ತಪ್ಪ ಚಮಲಾಪುರ, ಮಡು ಸಾಹುಕಾರ್, ಮಯೂರ ಪಾಟೀಲ, ಅಮಿತ್ ಮನಗೂಳಿ, ಪ್ರಕಾಶ ಹಜೇರಿ, ಸುರೇಶ ಹಜೇರಿ, ರಾಮಣ್ಣ ಕಟ್ಟಿಮನಿ, ಸಂಜು ಬರದೇನಾಳ, ಸದ್ದಾಂ ಬೀಳಗಿ, ನಾಗೇಶ ಕಟ್ಟಿಮನಿ, ರವಿ ಕಟ್ಟಿಮನಿ, ಕಳಕುಸಾ ರಂಗರೇಜ್ , ಸುರೇಶ ಫುಲೂಸ್, ಸಿರಸ ಕುಮಾರ ಹಜೇರಿ, ಮಹೇಶ ಛಲವಾದಿ, ವಿಶ್ವನಾಥ್ ಹಜೇರಿ ಸೇರಿದಂತೆ ನೂರಾರು ಹೋರಾಟಗಾರರು ಪಾಲ್ಗೊಂಡು ಸರ್ಕಾರದ ವಿರುದ್ಧ ಘೋಷಣೆಗಳನ್ನು ಕೂಗಿದರು.
ನಮ್ಮ ಧ್ವನಿ: “ಜನರ ತೆರಿಗೆ ಹಣದಲ್ಲಿ ನಿರ್ಮಾಣವಾಗುವ ಸೌಧ ಜನರಿಗೆ ಹತ್ತಿರವಿರಬೇಕೇ ಹೊರತು, ಮೈಲುಗಳಷ್ಟು ದೂರವಲ್ಲ. ಸರ್ಕಾರ ಕೂಡಲೇ ಎಚ್ಚೆತ್ತುಕೊಳ್ಳದಿದ್ದರೆ ಹೋರಾಟದ ಸ್ವರೂಪ ಬದಲಾಗಲಿದೆ.”
ವರದಿ ನಜೀರ್ ಚೋರಗಸ್ತಿ, ತಾಳಿಕೋಟಿ
