“ಮಕ್ಕಳ ನಗುವಿನಲ್ಲಿ ನಾಳಿನ ಭಾರತದ ಭವಿಷ್ಯ… ಬಾಲ್ಯಕ್ಕೆ ರೆಕ್ಕೆ ಕೊಡಿ, ಕನಸುಗಳಿಗೆ ಬಲ ತುಂಬಿ”

ಮಕ್ಕಳ ಹಕ್ಕುಗಳಿಗೆ ಗೌರವವಿರಲಿ… ಶಿಕ್ಷಣಕ್ಕೆ ಆದ್ಯತೆಯಿರಲಿ… ಬಾಲ್ಯಕ್ಕೆ ಸ್ವಾತಂತ್ರ್ಯವಿರಲಿ… ಜವಾಬ್ದಾರಿಯುತ ಸಮಾಜ ನಿರ್ಮಾಣವಾಗಲಿ.

ಮಕ್ಕಳು ಮನೆಯ ಅಂಗಳದಲ್ಲಿ ಅರಳುವ ಸುಂದರ ಹೂಗಳು, ಸಮಾಜದ ಭವಿಷ್ಯವನ್ನು ರೂಪಿಸುವ ಅಮೂಲ್ಯ ಸಂಪತ್ತು. ಅವರ ಮುಗ್ಧ ನಗು, ಕುತೂಹಲದ ಪ್ರಶ್ನೆಗಳು ಹಾಗೂ ಬಣ್ಣಬಣ್ಣದ ಕನಸುಗಳು ನಾಳಿನ ರಾಷ್ಟ್ರ ನಿರ್ಮಾಣದ ಭರವಸೆಯಾಗಿವೆ. ಆದ್ದರಿಂದ ಮಕ್ಕಳನ್ನು ಪ್ರೀತಿಸುವುದಷ್ಟೇ ಅಲ್ಲ, ಅವರ ಹಕ್ಕುಗಳನ್ನು ಗೌರವಿಸಿ, ಪ್ರತಿಭೆಯನ್ನು ಗುರುತಿಸಿ, ಉತ್ತಮ ಭವಿಷ್ಯ ರೂಪಿಸಲು ಅವಕಾಶ ಕಲ್ಪಿಸುವುದು ಪ್ರತಿಯೊಬ್ಬರ ಕರ್ತವ್ಯವಾಗಿದೆ.

ಭಾರತದಲ್ಲಿ ಪ್ರತಿವರ್ಷ ನವೆಂಬರ್ 14ರಂದು ಪಂಡಿತ್ ಜವಾಹರಲಾಲ್ ನೆಹರು ಅವರ ಜನ್ಮದಿನದ ಸ್ಮರಣಾರ್ಥ ಮಕ್ಕಳ ದಿನಾಚರಣೆಯನ್ನು ಆಚರಿಸಲಾಗುತ್ತದೆ.

ಮಕ್ಕಳನ್ನು ಅಪಾರವಾಗಿ ಪ್ರೀತಿಸುತ್ತಿದ್ದ ನೆಹರು ಅವರನ್ನು ಮಕ್ಕಳು ಪ್ರೀತಿಯಿಂದ ‘ಚಾಚಾ ನೆಹರು’ ಎಂದು ಕರೆಯುತ್ತಿದ್ದರು. ಮಕ್ಕಳೇ ದೇಶದ ನಿಜವಾದ ಸಂಪತ್ತು ಎಂಬ ಸಂದೇಶವನ್ನು ಸಾರುವ ದಿನವಿದು.

ಮಕ್ಕಳ ಹಕ್ಕುಗಳು – ಗೌರವಯುತ ಬದುಕಿನ ಅಡಿಪಾಯ

ಪ್ರತಿಯೊಂದು ಮಗುವಿಗೂ ಬದುಕುವ, ಶಿಕ್ಷಣ ಪಡೆಯುವ, ಆರೋಗ್ಯ ಕಾಪಾಡಿಕೊಳ್ಳುವ, ಪೌಷ್ಟಿಕ ಆಹಾರ ಪಡೆಯುವ, ರಕ್ಷಣೆ ಹೊಂದುವ ಹಾಗೂ ಅಭಿಪ್ರಾಯ ವ್ಯಕ್ತಪಡಿಸುವ ಹಕ್ಕುಗಳಿವೆ. ಬಾಲಕಾರ್ಮಿಕ ಪದ್ಧತಿ, ಬಾಲ್ಯವಿವಾಹ, ಮಕ್ಕಳ ಮೇಲಿನ ದೌರ್ಜನ್ಯ ಮತ್ತು ಶೋಷಣೆಯನ್ನು ತಡೆಯುವುದು ಸಮಾಜದ ಜವಾಬ್ದಾರಿಯಾಗಿದೆ. ಮಕ್ಕಳ ಕೈಯಲ್ಲಿ ಪುಸ್ತಕವಿರಬೇಕೇ ಹೊರತು ದುಡಿಮೆಯ ಭಾರವಲ್ಲ; ಅವರ ಮನಸ್ಸಿನಲ್ಲಿ ಕನಸಿರಬೇಕೇ ಹೊರತು ಭಯವಲ್ಲ.
ಶಿಕ್ಷಣ ಮತ್ತು ಬಾಲ್ಯ – ಬದುಕಿನ ಸುಂದರ ಬುನಾದಿ
ಶಿಕ್ಷಣವೆಂದರೆ ಕೇವಲ ಅಂಕ ಗಳಿಸುವುದಲ್ಲ; ಅದು ಜ್ಞಾನ, ಸಂಸ್ಕಾರ, ಆತ್ಮವಿಶ್ವಾಸ, ಮಾನವೀಯತೆ ಮತ್ತು ವೈಚಾರಿಕತೆಯನ್ನು ಬೆಳೆಸುವ ಸಾಧನ. ಪ್ರತಿಯೊಂದು ಮಗುವಿನಲ್ಲೂ ಒಂದೊಂದು ವಿಶೇಷ ಪ್ರತಿಭೆಯಿರುತ್ತದೆ. ಕೆಲವರಿಗೆ ಓದು, ಇನ್ನು ಕೆಲವರಿಗೆ ಕ್ರೀಡೆ, ಸಂಗೀತ, ಚಿತ್ರಕಲೆ ಹಾಗೂ ಸಾಹಿತ್ಯದಲ್ಲಿ ಆಸಕ್ತಿಯಿರುತ್ತದೆ. ಮಕ್ಕಳನ್ನು ಅಂಕಗಳ ಆಧಾರದ ಮೇಲೆ ಅಳೆಯದೆ ಅವರ ಪ್ರತಿಭೆಗೆ ಪ್ರೋತ್ಸಾಹ ನೀಡಬೇಕು.
ಇಂದಿನ ದಿನಗಳಲ್ಲಿ ಮೊಬೈಲ್, ದೂರದರ್ಶನ ಮತ್ತು ಸಾಮಾಜಿಕ ಜಾಲತಾಣಗಳು ಮಕ್ಕಳ ಬಾಲ್ಯದ ಮೇಲೆ ಪ್ರಭಾವ ಬೀರುತ್ತಿವೆ. ಆಟ, ಸ್ನೇಹ, ಪುಸ್ತಕ ಓದು ಮತ್ತು ಪ್ರಕೃತಿಯೊಂದಿಗಿನ ಒಡನಾಟ ಕಡಿಮೆಯಾಗುತ್ತಿದೆ. ತಂತ್ರಜ್ಞಾನದ ಬಳಕೆಗೆ ಮಿತಿ ವಿಧಿಸಿ, ಮಕ್ಕಳಿಗೆ ಸಂತೋಷದಾಯಕ ಹಾಗೂ ಒತ್ತಡರಹಿತ ಬಾಲ್ಯವನ್ನು ಕಲ್ಪಿಸಬೇಕು.

ಪೋಷಕರ ಜವಾಬ್ದಾರಿ – ಪ್ರೀತಿಯೊಂದಿಗೆ ಸಂಸ್ಕಾರ ನೀಡಿ

ಮನೆಯೇ ಮಗುವಿನ ಮೊದಲ ಪಾಠಶಾಲೆ, ತಂದೆ-ತಾಯಿಯೇ ಮೊದಲ ಗುರುಗಳು. ಮಕ್ಕಳಿಗೆ ಹಣ, ಆಸ್ತಿ ಮತ್ತು ಸೌಲಭ್ಯಗಳನ್ನು ಒದಗಿಸುವುದಕ್ಕಿಂತ ಪ್ರೀತಿ, ಸಮಯ, ಕಾಳಜಿ ಮತ್ತು ಉತ್ತಮ ಸಂಸ್ಕಾರ ನೀಡುವುದು ಮುಖ್ಯ. ಇತರ ಮಕ್ಕಳೊಂದಿಗೆ ಹೋಲಿಕೆ ಮಾಡದೆ, ಅವರ ಆಸಕ್ತಿ ಮತ್ತು ಸಾಮರ್ಥ್ಯವನ್ನು ಗುರುತಿಸಿ ಪ್ರೋತ್ಸಾಹಿಸಬೇಕು. ಮಕ್ಕಳ ಸಮಸ್ಯೆಗಳನ್ನು ಆಲಿಸಿ, ಅವರ ಕನಸುಗಳಿಗೆ ಬೆಂಬಲವಾಗಿ ನಿಲ್ಲಬೇಕು.

ಮಕ್ಕಳ ಜವಾಬ್ದಾರಿ – ಹಕ್ಕುಗಳೊಂದಿಗೆ ಕರ್ತವ್ಯಗಳ ಅರಿವು

ಮಕ್ಕಳು ತಂದೆ-ತಾಯಿ ಹಾಗೂ ಶಿಕ್ಷಕರನ್ನು ಗೌರವಿಸುವುದು, ಶಿಸ್ತಿನಿಂದ ಕಲಿಯುವುದು, ಸ್ವಚ್ಛತೆ ಕಾಪಾಡುವುದು, ಪರಿಸರವನ್ನು ಪ್ರೀತಿಸುವುದು ಮತ್ತು ಸಹಪಾಠಿಗಳೊಂದಿಗೆ ಸ್ನೇಹದಿಂದ ನಡೆದುಕೊಳ್ಳುವುದನ್ನು ರೂಢಿಸಿಕೊಳ್ಳಬೇಕು. ಮೊಬೈಲ್ ಮತ್ತು ಸಾಮಾಜಿಕ ಜಾಲತಾಣಗಳನ್ನು ಜವಾಬ್ದಾರಿಯಿಂದ ಬಳಸಬೇಕು. ದೇಶಪ್ರೇಮ, ಸಮಾನತೆ, ಸಹಬಾಳ್ವೆ ಹಾಗೂ ಮಾನವೀಯ ಮೌಲ್ಯಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು.
ಶಿಕ್ಷಕರು – ಮಕ್ಕಳ ಭವಿಷ್ಯದ ಶಿಲ್ಪಿಗಳು
ಶಿಕ್ಷಕರು ಕೇವಲ ಪಠ್ಯಪುಸ್ತಕದ ಪಾಠಗಳನ್ನು ಬೋಧಿಸುವವರಲ್ಲ; ಮಕ್ಕಳ ಬದುಕಿಗೆ ದಾರಿದೀಪವಾಗುವವರು. ಪ್ರತಿಯೊಂದು ಮಗುವಿನ ಸಾಮರ್ಥ್ಯವನ್ನು ಗುರುತಿಸಿ, ಪ್ರಶ್ನಿಸುವ ಸ್ವಾತಂತ್ರ್ಯ ನೀಡಿ, ಭಯಮುಕ್ತ ಕಲಿಕಾ ವಾತಾವರಣ ನಿರ್ಮಿಸಬೇಕು. ಪಠ್ಯಜ್ಞಾನದ ಜೊತೆಗೆ ನೈತಿಕ ಮೌಲ್ಯ, ವೈಜ್ಞಾನಿಕ ಮನೋಭಾವ, ಜೀವನ ಕೌಶಲ್ಯ ಮತ್ತು ಸಾಮಾಜಿಕ ಜವಾಬ್ದಾರಿಯನ್ನು ಬೆಳೆಸಬೇಕು. ಶಿಕ್ಷಕರು ಮತ್ತು ಪೋಷಕರ ಸಹಕಾರದಿಂದ ಮಾತ್ರ ಮಕ್ಕಳ ಸಮಗ್ರ ವ್ಯಕ್ತಿತ್ವ ವಿಕಸನ ಸಾಧ್ಯ.
ಮಕ್ಕಳ ಸಂತೋಷವೇ ಸಮಾಜದ ನಿಜವಾದ ಅಭಿವೃದ್ಧಿಯ ಮಾನದಂಡ. ಮಕ್ಕಳ ಹಕ್ಕುಗಳನ್ನು ರಕ್ಷಿಸುವ, ಶಿಕ್ಷಣಕ್ಕೆ ಆದ್ಯತೆ ನೀಡುವ, ಬಾಲ್ಯವನ್ನು ಸುರಕ್ಷಿತವಾಗಿಸುವ ಸಮಾಜವೇ ನಿಜವಾದ ನಾಗರಿಕ ಸಮಾಜ. ಮಕ್ಕಳ ದಿನಾಚರಣೆ ಕೇವಲ ಸಿಹಿ ಹಂಚಿಕೆ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಸೀಮಿತವಾಗದೆ, ಪ್ರತಿಯೊಂದು ಮಗುವಿನ ಬದುಕಿನಲ್ಲಿ ಸಂತೋಷ, ಭದ್ರತೆ ಮತ್ತು ಸಮಾನ ಅವಕಾಶಗಳನ್ನು ಕಲ್ಪಿಸುವ ಸಂಕಲ್ಪದ ದಿನವಾಗಲಿ.
ಮಕ್ಕಳ ಮೇಲೆ ನಮ್ಮ ಕನಸುಗಳನ್ನು ಹೇರದೆ, ಅವರದೇ ಕನಸುಗಳನ್ನು ನನಸಾಗಿಸಿಕೊಳ್ಳಲು ಅವಕಾಶ ನೀಡೋಣ. ಅವರ ಕೈಗೆ ಪುಸ್ತಕ ನೀಡಿ, ಮನಸ್ಸಿಗೆ ಆತ್ಮವಿಶ್ವಾಸ ತುಂಬಿ, ಬದುಕಿಗೆ ಮಾನವೀಯತೆಯ ಮೌಲ್ಯಗಳನ್ನು ಕಲಿಸೋಣ.

ಏಕೆಂದರೆ, ಇಂದಿನ ಮಗುವಿನ ನಗುವಿನಲ್ಲಿಯೇ ನಾಳಿನ ಭಾರತದ ಭವಿಷ್ಯ ಅಡಗಿದೆ.

ಎಲ್ಲ ಮಕ್ಕಳಿಗೂ ಮಕ್ಕಳ ದಿನಾಚರಣೆಯ ಹಾರ್ದಿಕ ಶುಭಾಶಯಗಳು.

ಲೇಖನ – ಆಂಜನೇಯ ಮಟ್ಟೂರು
ಲೇಖಕರು ಹಾಗೂ ಶಿಕ್ಷಕರು, ಗಂಗಾವತಿ.