ಅಪರೂಪದ ತಾಯಿ-ಮಗಳ ಭಾವನಾತ್ಮಕ ಸಮಾಗಮಕ್ಕೆ ಸಾಕ್ಷಿಯಾದ ಮಂಗಳೂರಿನ ಬೆಳ್ತಂಗಡಿ :
20 ವರ್ಷಗಳ ಬಳಿಕ 105ರ ತಾಯಿಯನ್ನು ಭೇಟಿಯಾದ 85ರ ಮಗಳು !
ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ ತಾಲೂಕಿನ ಕಾಡಂಚಿನ ಗ್ರಾಮವಾದ ಮಕ್ಕಿಯಲ್ಲಿ ಇತ್ತೀಚೆಗೆ ಅತ್ಯಂತ ಅಪರೂಪದ ಹಾಗೂ ಕಣ್ಣಾಲಿಗಳನ್ನು ಒದ್ದೆಯಾಗಿಸುವ ಘಟನೆಯೊಂದು ನಡೆದಿದೆ. ಹೆತ್ತ ತಾಯಿಯ ಮುಖ ನೋಡಲು 85 ವರ್ಷದ ವೃದ್ಧ ಮಗಳೊಬ್ಬರು ದುರ್ಗಮ ಕಾಡಿನ ಹಾದಿಯನ್ನು ಸವೆಸಿ ಬಂದಿದ್ದು, ಬರೋಬ್ಬರಿ 20 ವರ್ಷಗಳ ಬಳಿಕ ತಾಯಿ-ಮಗಳ ಸಮಾಗಮವಾಗಿದೆ.
ರಸ್ತೆ ಇಲ್ಲದ ಊರು : ದೂರವಾದ ತಾಯಿ-ಮಗಳು ಮಕ್ಕಿ ಗ್ರಾಮದ ನಿವಾಸಿ 105 ವರ್ಷದ ಸೀತಮ್ಮ ಅವರ ಮಗಳು ಸುಶೀಲಾ (85) ಅವರನ್ನು ಪಕ್ಕದ ಮಲವಂತಿಗೆ ಗ್ರಾಮಕ್ಕೆ ವಿವಾಹ ಮಾಡಿಕೊಡಲಾಗಿತ್ತು. ಎರಡು ಗ್ರಾಮಗಳು ಪಕ್ಕದಲ್ಲೇ ಇದ್ದರೂ, ತವರು ಮನೆಗೆ ಹೋಗಲು ಯಾವುದೇ ಸರಿಯಾದ ರಸ್ತೆ ವ್ಯವಸ್ಥೆ ಇರಲಿಲ್ಲ. ಈ ದುರ್ಗಮ ಹಾದಿಯಲ್ಲಿ ಸಂಚರಿಸುವುದು ವಯಸ್ಸಾದಂತೆ ಸುಶೀಲಾ ಅವರಿಗೆ ಸಾಧ್ಯವಾಗುತ್ತಿರಲಿಲ್ಲ. ಹೀಗಾಗಿ ಅವರು ಕಳೆದ 20 ವರ್ಷಗಳಿಂದ ತವರು ಮನೆಗೆ ಹೋಗುವುದನ್ನೇ ನಿಲ್ಲಿಸಿದ್ದರು. ತಮ್ಮ 65ನೇ ವಯಸ್ಸಿನಲ್ಲಿ ತಾಯಿಯನ್ನು ನೋಡಿದ್ದೇ ಕೊನೆ, ಆ ಬಳಿಕ ತಾಯಿಯನ್ನು ಕಾಣುವುದು ಅವರಿಗೆ ಕೇವಲ ಕನಸಾಗಿಯೇ ಉಳಿದಿತ್ತು.
ಮೊಮ್ಮಕ್ಕಳ ಆಸರೆ : ನನಸಾದ ಕನಸು ತಾಯಿಯನ್ನು ನೋಡಲೇಬೇಕೆಂಬ ವೃದ್ಧ ಮಗಳ ಹಂಬಲವನ್ನು ಅರಿತ ಮೊಮ್ಮಕ್ಕಳು ಅವರ ನೆರವಿಗೆ ನಿಂತರು. ಮೊಮ್ಮಕ್ಕಳ ಸಹಾಯದಿಂದ ಕಾಡು-ಮೇಡು, ಕಲ್ಲು-ಮುಳ್ಳಿನ ದುರ್ಗಮ ಹಾದಿಯನ್ನು ಕ್ರಮಿಸಿ, ವಯಸ್ಸಿನ ದಣಿವನ್ನು ಲೆಕ್ಕಿಸದೆ ಸುಶೀಲಾ ಅವರು ಕೊನೆಗೂ ತಾಯಿ ಸೀತಮ್ಮ ಅವರ ಮನೆಗೆ ಬಂದು ತಲುಪಿದರು. ಭವ್ಯ ಕ್ಷಣಕ್ಕೆ ಸಾಕ್ಷಿಯಾದ ತವರು ಮನೆನೂರು ವರ್ಷ ದಾಟಿದ ತಾಯಿ ಮತ್ತು ಎಂಬತ್ತರ ಹರೆಯದ ಮಗಳು ಪರಸ್ಪರ ಎದುರಾದಾಗ ಅಲ್ಲಿ ಭಾವನೆಗಳ ಮಹಾಪೂರವೇ ಹರಿಯಿತು. ಇಬ್ಬರ ಕಣ್ಣುಗಳೂ ಆನಂದಬಾಷ್ಪದಿಂದ ತುಂಬಿ ಬಂದವು. ತಾಯಿಯನ್ನು ಗಟ್ಟಿಯಾಗಿ ಅಪ್ಪಿಕೊಂಡ ಮಗಳು ಸುಶೀಲಾ, ” ಅಮ್ಮಾ, ಇದೇ ನಮ್ಮ ಕೊನೆಯ ಭೇಟಿ ” ಎಂದು ಭಾವುಕರಾಗಿ ನುಡಿದಾಗ ನೆರೆದಿದ್ದವರ ಕಣ್ಣುಗಳೂ ತೇವಗೊಂಡವು. ವೃದ್ಧಾಪ್ಯದ ದಣಿವು, ರಸ್ತೆ ಸಂಪರ್ಕದ ಕೊರತೆ ಎಲ್ಲವನ್ನೂ ಮೀರಿ ನಿಂತ ಹೆತ್ತ ಕರುಳಿನ ಈ ಅಪೂರ್ವ ಬಂಧದ ಭೇಟಿ ಇಡೀ ಜಿಲ್ಲೆಯ ಜನರ ಮನ ಸೆಳೆದಿದೆ.
ಜಗತ್ತಿನಲ್ಲಿ ಕಣ್ಣಿಗೆ ಕಾಣುವ ದೇವರೇ ತಾಯಿ, ದುಡ್ಡು ಕೊಟ್ಟರೂ ಸಿಗದ ಸೌಭಾಗ್ಯ ತಾಯಿಯ ಮಮತೆ.
ವಿಶೇಷ ವರದಿ : ಜಿಲಾನಸಾಬ್ ಬಡಿಗೇರ್
