ಕೆಟ್ಟ ಜನಗಳ ಮಧ್ಯೆ ಬದುಕುವ ಕಲೆ

(ನೆಮ್ಮದಿಯ ಜೀವನಕ್ಕೊಂದು ದಿಕ್ಸೂಚಿ)

ನಮ್ಮ ಸುತ್ತಲೂ ಇರುವ ಜಗತ್ತು ಹೂದೋಟದಂತಿರಬೇಕು ಎಂದು ನಾವೆಲ್ಲರೂ ಬಯಸುತ್ತೇವೆ. ಆದರೆ ವಾಸ್ತವ ಹಾಗೆ ಇರುವುದಿಲ್ಲ. ಈ ಸಮಾಜದಲ್ಲಿ ನಮಗೆ ಮುಳ್ಳಿನಂತಹ, ವಿಷದಂತಹ ಸ್ವಭಾವದ ವ್ಯಕ್ತಿಗಳೂ ಎದುರಾಗುತ್ತಾರೆ. ಪ್ರತಿಯೊಂದು ಹೆಜ್ಜೆಯಲ್ಲೂ ಕಾಲೆಳೆಯುವವರು, ಬೆನ್ನಿಗೆ ಚೂರಿ ಹಾಕುವವರು, ನಮ್ಮ ಯಶಸ್ಸನ್ನು ಕಂಡು ಕರುಬುವವರು ಸಿಗುತ್ತಲೇ ಇರುತ್ತಾರೆ. ಇಂತಹ ಕೆಟ್ಟ ಜನಗಳ ಮಧ್ಯೆ ಇದ್ದುಕೊಂಡೂ ನಮ್ಮತನವನ್ನು ಕಳೆದುಕೊಳ್ಳದೆ ಬದುಕುವುದು ಒಂದು ಅದ್ಭುತವಾದ ಕಲೆ.
ಕೆಸರಿನಲ್ಲಿ ಕಮಲ ಅರಳುವಂತೆ, ಸುತ್ತಲಿನ ವಾತಾವರಣ ಎಷ್ಟೇ ಕಲುಷಿತವಾಗಿದ್ದರೂ ನಮ್ಮ ಮೌಲ್ಯಗಳನ್ನು ಕಾಪಾಡಿಕೊಂಡು ಹೇಗೆ ಗೆದ್ದು ಬರಬೇಕು ಎಂಬುದಕ್ಕೆ ಇಲ್ಲಿದೆ

ಕೆಲವು ಜೀವನ್ಮುಖಿ ಸೂತ್ರಗಳು :

೧. ಗೋಡೆ ಕಟ್ಟಿಕೊಳ್ಳಿ, ಸೇತುವೆ ಅಲ್ಲ (ಭಾವನಾತ್ಮಕ ಅಂತರವಿರಲಿ)*
ಎಲ್ಲರೊಂದಿಗೆ ನಗುತ್ತಾ ಮಾತನಾಡಿ, ಸ್ನೇಹದಿಂದಿರಿ. ಆದರೆ ಎಲ್ಲರನ್ನೂ ನಿಮ್ಮ ಮನಸ್ಸಿನ ಒಳಗಿನ ಕೋಣೆಗೆ ಸೇರಿಸಬೇಡಿ. ನಿಮ್ಮ ವೈಯಕ್ತಿಕ ವಿಷಯಗಳು, ನಿಮ್ಮ ದೌರ್ಬಲ್ಯಗಳು ಹಾಗೂ ನಿಮ್ಮ ಕನಸುಗಳು ಕೆಟ್ಟ ಜನರ ಕೈಗೆ ಸಿಕ್ಕರೆ, ಅವುಗಳನ್ನೇ ಅವರು ನಿಮ್ಮ ವಿರುದ್ಧ ಅಸ್ತ್ರಗಳನ್ನಾಗಿ ಬಳಸುತ್ತಾರೆ. ಪ್ರತಿಯೊಬ್ಬರಿಗೂ ಒಂದು ಗಡಿರೇಖೆಯನ್ನು ನಿಗದಿಪಡಿಸಿ. ನಿಮ್ಮ ಆತ್ಮೀಯ ವಲಯಕ್ಕೆ ಯಾರು ಅರ್ಹರೋ ಅವರಿಗೆ ಮಾತ್ರ ಮುಕ್ತವಾಗಿರಿ, ಉಳಿದವರೊಂದಿಗೆ ಕೇವಲ ಔಪಚಾರಿಕ ಸಂಬಂಧವಿರಲಿ.

೨. ರಿಯಾಕ್ಟ್ ಮಾಡಬೇಡಿ, ರೆಸ್ಪಾಂಡ್ ಮಾಡಿ (ಮೌನದ ತಾಕತ್ತು)

ಕೆಟ್ಟ ಸ್ವಭಾವದ ಜನರ ಮುಖ್ಯ ಉದ್ದೇಶವೇ ನಿಮ್ಮನ್ನು ಕೆರಳಿಸುವುದು. ನೀವು ಕೋಪಗೊಳ್ಳಬೇಕು, ಅಳಬೇಕು, ಜಗಳವಾಡಬೇಕು ಎಂದು ಅವರು ಕಾಯುತ್ತಿರುತ್ತಾರೆ. ನಿಮ್ಮ ಆಕ್ರೋಶವೇ ಅವರಿಗೆ ಸಿಗುವ ಅತಿ ದೊಡ್ಡ ಆನಂದ. ಹಾಗಾಗಿ, ಅವರು ಕೆಣಕಿದಾಗ ತಕ್ಷಣ ಪ್ರತಿಕ್ರಿಯೆ ನೀಡುವ ಮೂಲಕ ನಿಮ್ಮ ಸಮಚಿತ್ತವನ್ನು ಕಳೆದುಕೊಳ್ಳಬೇಡಿ. ಬದಲಿಗೆ ಶಾಂತವಾಗಿ ಯೋಚಿಸಿ ಪ್ರತಿಕ್ರಿಯಿಸಿ ಕೆಲವು ಕಡೆ ಏನೂ ಮಾತನಾಡದೆ ಸೈಲೆಂಟ್ ಆಗಿ ಅಲ್ಲಿಂದ ಹೊರಟುಹೋಗುವುದೇ ಅವರಿಗೆ ಕೊಡುವ ಅತಿ ದೊಡ್ಡ ಉತ್ತರವಾಗಿರುತ್ತದೆ. ನಿಮ್ಮ ಮೌನ ಅವರ ಅಹಂಕಾರಕ್ಕೆ ಚಾಟಿಯಾಗಲಿ.

೩. ನಿಮ್ಮ ಸಕಾರಾತ್ಮಕ ಎನರ್ಜಿಯನ್ನು ಕಾಪಾಡಿಕೊಳ್ಳಿ
ವಿಷಕಾರಿ ವ್ಯಕ್ತಿಗಳೊಂದಿಗೆ ದಿನವೂ ವಾದ ಮಾಡುತ್ತಾ ಕೂತರೆ ನಿಮ್ಮ ಮನಸ್ಸಿನ ಶಾಂತಿ, ನೆಮ್ಮದಿ ಎಲ್ಲವೂ ಹಾಳಾಗುತ್ತದೆ. ನಿಮ್ಮ ಶಕ್ತಿ ಅತ್ಯಂತ ಅಮೂಲ್ಯವಾದದ್ದು, ಅದನ್ನು ಸಣ್ಣಬುದ್ಧಿಯ ಜನರ ಮೇಲೆ ವ್ಯರ್ಥ ಮಾಡಬೇಡಿ. ಕಚೇರಿಯಲ್ಲೋ ಅಥವಾ ಸಮಾಜದಲ್ಲೋ ಅಂತಹ ಜನರ ಜೊತೆಗಿನ ಕೆಲಸ ಮುಗಿದ ತಕ್ಷಣ, ಮಾನಸಿಕವಾಗಿ ಆ ವಲಯದಿಂದ ಹೊರಗೆ ಬನ್ನಿ. ನಿಮ್ಮನ್ನು ಪ್ರೀತಿಸುವವರ ಜೊತೆ ಸಮಯ ಕಳೆಯಿರಿ, ನಿಮ್ಮ ನೆಚ್ಚಿನ ಹವ್ಯಾಸಗಳಲ್ಲಿ ನಿಮ್ಮನ್ನು ನೀವು ತೊಡಗಿಸಿಕೊಳ್ಳಿ. ನಿಮ್ಮ ಶಕ್ತಿಯನ್ನು ಸಕಾರಾತ್ಮಕವಾಗಿ ಮರುಪೂರಣ ಮಾಡಿಕೊಳ್ಳಿ.

೪. ಕೆಟ್ಟವರಂತೆ ನೀವು ಬದಲಾಗಬೇಡಿ (ನಿಮ್ಮ ಮೌಲ್ಯವೇ ನಿಮ್ಮ ಬಲ)
“ಮುಳ್ಳನ್ನು ಮುಳ್ಳಿನಿಂದಲೇ ತೆಗಿಬೇಕು” ಎಂಬ ಮಾತು ಎಲ್ಲ ಕಡೆ ನಡಿಯಲ್ಲ. ಸೇಡು ತೀರಿಸಿಕೊಳ್ಳುವ ಭರದಲ್ಲಿ ನೀವೂ ಕೆಟ್ಟ ದಾರಿ ಹಿಡಿದರೆ, ಅವರಿಗೂ ನಿಮಗೂ ವ್ಯತ್ಯಾಸವೇ ಇರುವುದಿಲ್ಲ. ಅವರ ಕೆಟ್ಟತನಕ್ಕೆ ನಿಮ್ಮ ಒಳ್ಳೆಯತನವೇ ಉತ್ತರವಾಗಲಿ. ನಿಮ್ಮ ಪ್ರಾಮಾಣಿಕತೆ ಮತ್ತು ಮೌಲ್ಯಗಳೇ ನಿಮ್ಮ ಅತಿ ದೊಡ್ಡ ಶಕ್ತಿ. ಕೆಟ್ಟದ್ದಕ್ಕೆ ಕೆಟ್ಟದ್ದನ್ನು ಮಾಡುವುದಕ್ಕಿಂತ, ನಿಮ್ಮ ಯಶಸ್ಸಿನ ಮೂಲಕ ಅವರಿಗೆ ತಕ್ಕ ಉತ್ತರ ನೀಡಿ.

೫. ಅತಿಯಾದ ನಿರೀಕ್ಷೆಗಳನ್ನು ಬಿಟ್ಟುಬಿಡಿ

ನಮ್ಮ ದುಃಖಕ್ಕೆ ಮುಖ್ಯ ಕಾರಣ ಕೆಟ್ಟ ಜನರಿಗಿಂತ ಹೆಚ್ಚಾಗಿ, ಅವರ ಮೇಲಿನ ನಮ್ಮ ನಿರೀಕ್ಷೆಗಳು. “ನಾನು ಇಷ್ಟೊಂದು ಒಳ್ಳೆಯವನಾಗಿದ್ದರೂ ಅವರು ಯಾಕೆ ಹೀಗೆ ಮಾಡುತ್ತಿದ್ದಾರೆ?” ಎಂಬ ಪ್ರಶ್ನೆ ನಮ್ಮನ್ನು ಕಾಡುತ್ತದೆ. ಕಹಿ ಬೇವಿನ ಮರದಿಂದ ಮಾವಿನ ಹಣ್ಣನ್ನು ನಿರೀಕ್ಷಿಸಲು ಸಾಧ್ಯವಿಲ್ಲ ಅಲ್ವೇ? ಹಾಗೆಯೇ, ಕೆಟ್ಟ ವ್ಯಕ್ತಿಗಳಿಂದ ಒಳ್ಳೆಯದನ್ನು ನಿರೀಕ್ಷಿಸುವುದನ್ನು ನಿಲ್ಲಿಸಿಬಿಡಿ. ಅವರ ಸ್ವಭಾವವೇ ಅಷ್ಟು ಎಂದು ಒಪ್ಪಿಕೊಂಡಾಗ, ಅವರ ನಡೆಗಳು ನಿಮಗೆ ಆಘಾತವನ್ನು ಉಂಟುಮಾಡುವುದಿಲ್ಲ.

೬. ಸ್ವಯಂ ನಿಯಂತ್ರಣ ಮತ್ತು ಆತ್ಮವಿಶ್ವಾಸವನ್ನು ವೃದ್ಧಿಸಿಕೊಳ್ಳಿ

ಬೇರೆಯವರು ನಿಮ್ಮ ಬಗ್ಗೆ ಏನು ಯೋಚಿಸುತ್ತಾರೆ, ಏನು ಮಾತನಾಡುತ್ತಾರೆ ಎಂಬುದು ನಿಮಗೆ ಮುಖ್ಯವಾಗಬಾರದು. ನಿಮ್ಮ ರಿಮೋಟ್ ಕಂಟ್ರೋಲ್ ಅನ್ನು ಇನ್ನೊಬ್ಬರ ಕೈಗೆ ಕೊಡಬೇಡಿ. ಅವರು ಹೊಗಳಿದಾಗ ಉಬ್ಬುವುದು, ತೆಗಳಿದಾಗ ಕುಗ್ಗುವುದು ದುರ್ಬಲ ಮನಸ್ಸಿನ ಲಕ್ಷಣ. ನಿಮ್ಮ ಸಾಮರ್ಥ್ಯ ಏನೆಂದು ನಿಮಗೇ ಚೆನ್ನಾಗಿ ತಿಳಿದಿರಲಿ. ನಿಮ್ಮ ಆತ್ಮವಿಶ್ವಾಸದ ಕೋಟೆ ಎಷ್ಟು ಗಟ್ಟಿಯಾಗಿರಬೇಕೆಂದರೆ, ಹೊರಗಿನ ಯಾವುದೇ ನಕಾರಾತ್ಮಕ ಗಾಳಿ ಅದನ್ನು ಅಲುಗಾಡಿಸಲು ಸಾಧ್ಯವಾಗಬಾರದು.

ಕಾಲ ಎಲ್ಲದಕ್ಕೂ ಉತ್ತರ ನೀಡುತ್ತದೆ
ಜಗತ್ತಿನಲ್ಲಿ ಕರ್ಮ ಎಂಬುದು ಒಂದು ದೊಡ್ಡ ಶಕ್ತಿ. ನಾವು ಏನನ್ನು ಬಿತ್ತುತ್ತೇವೋ ಅದನ್ನೇ ಕೊಯ್ಯುತ್ತೇವೆ. ಇಂದು ಕೆಟ್ಟತನ ಗೆದ್ದಂತೆ ಕಾಣಬಹುದು, ಆದರೆ ಅಂತಿಮವಾಗಿ ಸತ್ಯ ಮತ್ತು ಒಳ್ಳೆಯತನಕ್ಕೇ ಜಯ. ಹಾಗಾಗಿ, ಯಾರು ನಿಮಗೆ ಅನ್ಯಾಯ ಮಾಡಿದ್ದಾರೋ ಅವರ ಬಗ್ಗೆ ಯೋಚಿಸುತ್ತಾ ನಿಮ್ಮ ಇಂದಿನ ದಿನವನ್ನು ಹಾಳು ಮಾಡಿಕೊಳ್ಳಬೇಡಿ. ನ್ಯಾಯವನ್ನು ಕಾಲಕ್ಕೆ ಬಿಟ್ಟುಬಿಡಿ. ನೀವು ದೂರ ನಿಂತು ನಿಮ್ಮ ಕರ್ತವ್ಯವನ್ನು ನಿಷ್ಠೆಯಿಂದ ಮಾಡಿ.
*
ಜೀವನ ಎನ್ನುವುದು ಒಂದು ಕನ್ನಡಿಯಿದ್ದಂತೆ. ನಾವು ನಮ್ಮ ಮುಖವನ್ನು ಹೇಗೆ ಸ್ವಚ್ಛವಾಗಿಟ್ಟುಕೊಳ್ಳುತ್ತೇವೋ ಹಾಗೆಯೇ ನಮ್ಮ ಮನಸ್ಸನ್ನೂ ಕಲುಷಿತವಾಗದಂತೆ ನೋಡಿಕೊಳ್ಳಬೇಕು. ಕೆಟ್ಟ ಕೆಸರಿನ ಮಧ್ಯದಲ್ಲೂ ತನ್ನ ಸುಂದರ ಸೌರಭವನ್ನು ಬೀರುವ ಕಮಲದಂತೆ, ನಮ್ಮ ಸುತ್ತಲಿನ ನಕಾರಾತ್ಮಕತೆಯ ನಡುವೆಯೂ ನಮ್ಮ ಮೌಲ್ಯ, ಪ್ರೀತಿ ಮತ್ತು ಮಾನವೀಯತೆಯನ್ನು ಕಳೆದುಕೊಳ್ಳದೆ ಬೆಳೆಯುವುದೇ ನಿಜವಾದ ಗೆಲುವು, ಅದೇ ಸಾರ್ಥಕ ಜೀವನ.

• ಡಾ. ಪ್ರಸನ್ನ ದೇವರ ಮಠ ಅನಿಲಕುಮಾರ್, ಮಾಗಳ
  ಪದವೀಧರ ಪ್ರಾಥಮಿಕ ಶಿಕ್ಷಕರು
  ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ, ಮುದೇನೂರು,
  ಹೂವಿನಹಡಗಲಿ, ವಿಜಯನಗರ ಜಿಲ್ಲೆ.